O‘zbek tibbiyoti tarixida ilk bor shifokorlar tomonidan siam egizaklari o‘ta noyob operatsiya natijasida ajratib olindi, deb xabar bermoqda Sog‘liq saqlash vazirligi matbuot xizmati.
Ma’lum qilinishicha, chaqaloqlar 2022-yil 31-mayda dunyoga kelgan bo‘lib, ulardagi bu noodatiy holat homilaning 28 haftaligida aniqlangan va bo‘lajak ona O‘sh shahridan Bishkek shahriga yuborilgan. 29-haftada tug‘uruq jarayoni kesarcha usulida amalga oshirilgan. Dunyoga kelganida umumiy vazni 1 600 gramm bo‘lgan chaqaloqlarga Fotima va Zuhra deb ism qo‘yilgan.
Chaqaloqlar tanasining qorin qismi, aniqrog‘i, jigari bilan birlashgan edi. Bitta ichki a’zolarga ega egizaklarni ajratish esa o‘ta murakkab va xavfli operatsiya edi. Ular yaqin qarindoshlar o‘rtasidagi nikoh, ya’ni opa-singillarning farzandlaridan dunyoga kelgan.
Tug‘uruqdan 10 kun o‘tgach, ota-onaga bolalarning yashab qolish imkoni umuman yo‘qligi aytilib, uyiga ruxsat berilgan. Ammo farzandlarining yashab ketishidan umid uzmagan ota-ona oradan bir oy o‘tgach, o‘zbekistonlik yaqinlaridan Respublika perinatal markazi qoshidagi Neonatal xirurgiya o‘quv-davolash-metodik markazi haqida eshitgan va 2022-yil iyun oyida ushbu makazga murojaat qilgan.
Markaz rahbari egizaklarni har oy onlayn tarzda tibbiy nazorat qilib borgan. Oktabr oyida 5 oylik bo‘lib qolgan go‘daklar Toshkentga olib kelingan.
Operatsiya 19-dekabr kuni bo‘lib o‘tgan va amaliyot 3 soat davom etgan.
“Bolalar bir-biri bilan jigar orqali birlashgani o‘z isbotini topdi. Bolalarni ajratganda jigardan va boshqa qon tomirlardan qon ketishining oldini olish maqsadida ultratovush va argon skalpeli, shuningdek, Bloodstop deb atalgan zamonaviy gemostatik materialdan foydalandik. Natijada minimal darajada qon ketishi bilan bolalar ajratib olindi, — deydi Respublika perinatal markazi qoshidagi neonatal xirurgiya markazi rahbari Baxtiyor Ergashev.
Chaqaloqlar o‘t pufaklari alohida-alohida shakllangan bo‘lgan. Bu esa ikki tana ajratilganida, bu a’zolar o‘z vazifasini bekam-u ko‘st bajarishini ta’minlagan va egizaklar muvaffaqiyatli ajratib olingan. Operatsiyaning keyingi bosqichida tibbiy jamoa ikki guruhga bo‘linib, ish olib borgan.
Vazirlik xabarida qayd etilishicha, shu paytgacha O‘zbekistonda bu turdagi amaliyot faqat bir marta Respublika ixtisoslashtirilgan xirurgiya ilmiy-amaliy tibbiyot markazida amalga oshirilgan. Unda ham operatsiya chet eldan chaqirilgan mutaxassis boshchiligida va bevosita ishtirokida kechgan. Neonatal xirurgiya o‘quv-davolash-metodik markazida o‘tkazilgan ushbu o‘ta murakkab amaliyot esa to‘liq o‘zbek shifokorlari tomonidan amalga oshirildi.
Mutaxassislar bolalarning ahvolini stabil deb baholamoqda. Yaqin kunlarda chaqaloqlarni yashash joyiga chiqarishga umid qilinmoqda.
Operatsiyada ishtirok etgan mutaxassislar Sog‘liqni saqlash vaziri Amrillo Inoyatov tomonidan “Sog‘liqni saqlash a’lochisi” ko‘krak nishoni va faxriy yorliqlar bilan taqdirlandi.
Izoh (0)