“Tolibon” vakillarining Twitter akkauntlaridagi verifikatsiya belgilari (“ko‘k galochka”) olib tashlandi. Bu haqda The Guardian xabar berdi.
Ma’lum qilinishicha, “Tolibon”ning kamida ikki amaldori — axborot olish bo‘limi boshlig‘i Hidayatulloh Hidoyat va OAV nazorati bo‘limi rahbari Abdulhaq Hammad verifikatsiya belgisini olgan. Ularning Twitter’da mos ravishda 187 000 va 170 000 a’zosi bor. Afg‘oniston rasmiylarining akkauntida 16-yanvar kuni “ko‘k galochka” qayd etilgan.
O‘sha kuni sobiq “Tolibon” rasmiysi Twitter’ning egasi Ilon Maskni maqtab, “Twitter’ni yana ajoyib qilib qo‘yayotganini” qayd etgan. Bu ko‘plab foydalanuvchilarning noroziligiga sabab bo‘lgan. Hodisadan bir kun o‘tib, 17-yanvar kuni “Tolibon”dan tasdiqlash belgisi olib tashlangan. Biroq ularni ijtimoiy tarmoq yoki egalarining o‘zlari olib tashlaganmi, aniq emas.
Bunday holat “Tolibon” generalining akkaunti bilan ham yuz bergan, u milliarder Ilon Mask Afg‘onistonda tug‘ilganini aytganidan keyin “ko‘k galochka” g‘oyib bo‘lgan.
Ilon Mask Twitter’ni sotib olganidan so‘ng, ijtimoiy tarmoqda istalgan foydalanuvchi Twitter Blue xizmati orqali “galochka” xarid qilishi mumkin. Uning narxi oyiga 8 dollar bo‘lib, Apple foydalanuvchilari qo‘shimcha 11 dollar to‘laydi.
Twitter Blue paydo bo‘lishidan oldin “Tolibon” rasmiy akkauntlarining hech birida “ko‘k galochka” bo‘lmagan. “Tolibon” rasmiylari Twitter’ning faol foydalanuvchilari bo‘lib, undan muhim xabarlarni tarqatish uchun foydalanadi.
Izoh (0)