Ukraina prezidenti Vladimir Zelenskiy ittifoqchilarini Rossiya bilan urush paytida Kiyevga yordam berish bo‘yicha qarorlarni tezlashtirishga chaqirdi. Bu haqda u Davosda bo‘lib o‘tayotgan Jahon iqtisodiy forumida videoaloqa orqali gapirdi.
Fojialar hayotdan o‘zib ketmoqda. Zolimlik demokratiyadan oldinda. Urushni boshlash uchun Rossiyaga bir soniya ham kerak bo‘lmadi. Ammo unga qarshi birinchi sanksiyalarni joriy qilishda dunyoga bir necha kun kerak bo‘ldi. Erkin dunyo o‘ylashga sarflagan vaqtini terrorchi davlat o‘ldirishga sarflamoqda.Zelenskiy Ukrainani havo hujumidan mudofaa tizimlari bilan ta’minlash Rossiyaning navbatdagi raketa hujumlaridan oldin, Kiyevga g‘arb tanklarini berish Rossiya zirhli mashinalarining bostirib kirishidan oldin, Ukrainada tinchlikni tiklash esa Rossiya boshqa davlatlarga hujum qilishidan oldin amalga oshirilishi kerakligini ta’kidladi.2014-yilda Rossiya hech ikkilanmasdan Qrimni bosib olganida dunyo ikkilandi. 2022-yilda Rossiya ikkilanmasdan to‘liq miqyosli urushga kirganida dunyo ikkilandi. Dunyo bugun va boshqa hech qachon ikkilanmasligi kerak. Yovuzlik qasos olishga intilganda, dunyoga qat’iyat va tezlik zarur, — dedi Zelenskiy.
Ukraina rahbari nutqidan keyingi savollarga javob berar ekan, Kiyev viloyatining Brovari shahridagi vertolyot halokatini urush oqibati deb bilishini aytdi. “Men buni bugun men va jamiyatimiz boshdan kechirayotgan urush oqibati deb bilaman: bu tasodif emas, bu urush. Urush nafaqat jang maydonida. Urush bir necha yo‘nalishda ketmoqda. Buyog‘iga baxtsiz hodisa degan narsa yo‘q, bularning barchasi urush oqibati”, — dedi Zelenskiy.
18-yanvar kuni Brovari shahrida favqulodda davlat xizmati vertolyoti qulab tushdi, hodisa oqibatida bortdagi Ukraina ichki ishlar vaziri Denis Monastirskiy, uning o‘rinbosari va yana bir nechta amaldorlar halok bo‘ldi. Vertolyot turar joy binosi va bolalar bog‘chasi o‘rtasida qulagan, bir necha bolalar ham halok bo‘lgan.
Izoh (0)