Ekvatorial Gvineya prezidentining o‘g‘li Ruslan Obiang Nsue mamlakat milliy aviakompaniyasiga tegishli samolyotni sotishda ayblanib, hibsga olindi. Bu haqda Africa News xabar berdi.
Noyabr oyi oxirida rasmiylar Ceiba Intercontinental milliy kompaniyasiga tegishli ATR 72-500 samolyoti g‘oyib bo‘lganini payqagach, tergov boshlagan. ATR samolyoti aviatsiyaga texnik xizmat ko‘rsatishga ixtisoslashgan va Ispaniyaning Gran Kanaria orolida joylashgan Binter Technic kompaniyasiga sotilgani aytilmoqda.
Samolyot 2018-yilda rejali texnik xizmat ko‘rsatish uchun Ispaniyaga jo‘natilgan. Obiang uni Ispaniyaning Gran Kanariya orolida joylashgan Binter Technic aviakompaniyasiga sotganlikda gumon qilinmoqda. ATR 72-500 — 1980-yillarning oxirida fransuz-Italiya ishlab chiqaruvchisi ATR tomonidan ishlab chiqilgan turbovintli samolyot bo‘lib, bort 78 kishini tashiy oladi.
Obiang sobiq sport va yoshlar vaziri, bugungi kunda Ceiba Aeropuertos kompaniyasi rahbari hisoblanadi.
“Ruslan Obiang Ceiba aviakompaniyasini sotgan shaxs ekanini tan oldi. Men o‘zimni oilaviy rishtalar yoki tarafdorlik bilan chalg‘itishga yo‘l qo‘ymayman. Shuning uchun uni zudlik bilan hibsga olib, adolatga topshirishni buyurdim”, — dedi uning o‘gay ukasi, vitse-prezident Teodoro Nguema Obiang.
Abadiy prezident
Taxminan 1,5 million aholiga ega G‘arbiy Afrika davlati 1968-yilda Ispaniyadan mustaqillikka erishganidan beri bor-yo‘g‘i ikki nafar prezidentga ega bo‘ldi. Obiang 1979-yilda to‘ntarish natijasida amakisi Fransisko Makias Nguemani hokimiyatdan chetlatgan.
Izoh (0)