Yangi Zelandiya tashqi ishlar vaziri Nanayya Maxuta rossiyalik siyosatchilar va mudofaa sektoriga qarshi yangi sanksiyalarni e’lon qildi. Yangi cheklov choralari Rossiya Federatsiya Kengashining 170 nafar a’zosiga hamda “Ukraina suvereniteti va hududiy yaxlitligiga tajovuz qilishga hissa qo‘shgan” oltita mudofaa korxonasiga qarshi qaratilgan.
Yangi Zelandiya rasmiylari shuningdek, ilgari mamlakatga kirishi taqiqlangan 400 dan ortiq rossiyaliklarga nisbatan sanksiyalarni kuchaytirdi.
“Bu sanksiyalar ostiga tushgan shaxslarning Yangi Zelandiyada faoliyat yuritishiga to‘sqinlik qiladi hamda mamlakatimiz Rossiyaning noqonuniy harakatlariga aloqadorlar uchun moliyaviy boshpanaga aylanishining oldini oladi”, — dedi Maxuta.
Yangi Zelandiya fevral oyi oxiridan beri Rossiyaga qarshi bir nechta sanksiyalar paketini joriy qildi. Mart oyi o‘rtalarida mamlakat Rossiya prezidenti Vladimir Putin, bosh vazir Mixail Mishustin, tashqi ishlar vaziri Sergey Lavrov, mudofaa vaziri Sergey Shoyguga qarshi sanksiyalar kiritgan edi. Ushbu cheklovlarga aktivlarni muzlatish va mamlakatga kirishni taqiqlash kabilarni nazarda tutadi.
Bundan tashqari, Vellington 360 dan ortiq rossiyalik, jumladan, prezident matbuot kotibi Dmitriy Peskov, “Sberbank” bosh direktori German Gref kabilarning mamlakatga kirishini taqiqlagan.
Aprel oyi boshida Yangi Zelandiya “Rossiyaning strategik tarmoqlari bilan chambarchas bog‘liq bo‘lgan mahsulotlar” eksportini cheklab, Rossiyaning 18 ta banki va moliya institutiga sanksiya qo‘llagan edi.
Rossiya Tashqi ishlar vazirligi Yangi Zelandiyani “kollektiv G‘arb” tashabbusi bilan boshlangan “rusofobik kurs”da aybladi. Bunga javoban Moskva mamlakatning 130 nafar vakili, jumladan, general-gubernator Sintia Kiro, bosh vazir Jasinda Ardern, uning o‘rinbosari Grant Robertson, Maxut, mudofaa vaziri Pini Henarening Rossiyaga kirishini taqiqladi.
Izoh (0)