Янги Зеландия бош вазири Жасинда Ардерн беш йиллик фаолиятидан кейин ўз лавозимини тарк этишга қарор қилди, деб ёзади Deutsche Welle.
Янги Зеландия ҳукумати раҳбари 2023 йил 7 февраль куни истеъфога чиқмоқчи. Унинг сўзларига кўра, бу лавозимга қайта сайланиш нияти йўқ. Таъкидланишича, Ардерн телевидение орқали намойиш этилган матбуот анжуманида баёнот бераётган вақтида хафа ҳолатда бўлган.
Watch: New Zealand Prime Minister Jacinda Ardern announces resignation.
— The Canadian Independent (@canindependent) January 19, 2023
Ardern will not seek re-election and plans to step down before Feb. 7. pic.twitter.com/NDPj0w8tSk
«Мен учун вақт келди. Яна тўрт йилга кучим етмайди. Бу ҳаётимдаги энг мазмунли беш ярим йил бўлди. Кетишимга сабаб шуки, бундай ўзига хос иш катта масъулиятни юклайди. Бу шундай масъулиятки, етакчи ролига айни пайтда муносибмисан, йўқми — билиб туришинг керак», — деди у ўзининг Лейбористлар партияси аъзоларига қарата, шу билан у ўз истеъфоси ортида ҳеч қандай яширин можаро йўқлигини билдирди.
Бош вазир, шунингдек, 14 октябрь куни умумий сайловлар бўлиб ўтишини эълон қилди.
«Сайловларда иштирок этмасам-да, аниқ биламан, янги зеландияликларни энг кўп ташвишлантирадиган масалалар шу йил мобайнида ва сайловларга қадар диққат марказида бўлиб қолади», — деди Ардерн.
Ардерн 2017 йилда 37 ёшида ҳукумат раҳбари этиб сайланган эди — у дунёдаги энг ёш аёл раҳбарлардан бири ҳисобланади. Шунингдек, у ўз лавозимида ишлаётиб фарзандли бўлган камдан-кам юқори мансабдорлардан ҳам биридир.
Ардерн уч йил давом этган коронавирус пандемияси чоғида Янги Зеландияни бошқарган бўлиб, унинг инқирозни енгиб ўтиш бўйича хатти-ҳаракатлари халқаро ҳамжамият мақтовига сазовор бўлди.
Изоҳ (0)