Kreml ma’muriyatidagi “juda ko‘p odamlar” Rossiyaning Ukrainadagi urushda tezroq mag‘lub bo‘lishini kutmoqda. Bu haqda Yevgeniy Prigojinning matbuot xizmati xabar berdi.

Ukrainadagi urush fonida Prigojin tobora ko‘zga ko‘ringan shaxsga aylanib bormoqda. Ommaviy bayonotlaridan birida u Rossiyada YouTube hali ham bloklanmagani uchun Kreml ma’muriyatini tanqid qilgan. U buning bir qancha sabablarini ham tushuntirgan.

“Birinchi va asosiy sabab shundaki, prezident ma’muriyatida juda ko‘p odamlar Rossiya urushda imkon qadar tezroq mag‘lub bo‘lsa, amerikaliklar kelib, bizni tartibga solishsa, deb o‘ylaydi”, — deyiladi xabarda.

Rossiyada rus qo‘shinlarining Ukrainaga bostirib kirishi fonida axborot makonini nazorat qilish maqsadida xorijiy media va ijtimoiy tarmoqlarga nisbatan repressiv choralar kuchaygan.

Prigojin global videoxostingda nashr etilgan videomateriallarning 40 foizi “siyosiylashtirilgan va Rossiyaga qarshi qaratilgan”ini aytgan. Biroq, u bu haqda hech qanday dalil keltirmagan. “Vagner” asoschisi xorijda yashayotgan, dam olayotgan va bolalarni chet elda tarbiyalayotgan rasmiylarni  “vatan xoinlari” deb atagan.

Prigojinning Kreml ma’muriyatiga qarshi dadil bayonotlari haqida CNN ham xabar bergan. Nashr Rossiya prezidenti Vladimir Putin Prigojin va uning “Vagner” yollanma askarlaridan Rossiya elitasini to‘xtatib turish uchun foydalanayotgani ta’kidlanadi. Rossiyaning Ukrainaga keng bostirib kirishi paytida Prigojin jamoat arbobiga aylangan. U “Vagner”xususiy harbiy kampaniyani yaratishdagi rolini ochiq tan oladi va Kreml ruxsati bilan o‘n minglab mahbusni urushda qatnashishga jalb qilmoqda.