Кремль маъмуриятидаги «жуда кўп одамлар» Россиянинг Украинадаги урушда тезроқ мағлуб бўлишини кутмоқда. Бу ҳақда Евгений Пригожиннинг матбуот хизмати хабар берди.
Украинадаги уруш фонида Пригожин тобора кўзга кўринган шахсга айланиб бормоқда. Оммавий баёнотларидан бирида у Россияда YouTube ҳали ҳам блокланмагани учун Кремль маъмуриятини танқид қилган. У бунинг бир қанча сабабларини ҳам тушунтирган.
«Биринчи ва асосий сабаб шундаки, президент маъмуриятида жуда кўп одамлар Россия урушда имкон қадар тезроқ мағлуб бўлса, америкаликлар келиб, бизни тартибга солишса, деб ўйлайди», — дейилади хабарда.
Россияда рус қўшинларининг Украинага бостириб кириши фонида ахборот маконини назорат қилиш мақсадида хорижий медиа ва ижтимоий тармоқларга нисбатан репрессив чоралар кучайган.
Пригожин глобал видеохостингда нашр этилган видеоматериалларнинг 40 фоизи «сиёсийлаштирилган ва Россияга қарши қаратилган»ини айтган. Бироқ, у бу ҳақда ҳеч қандай далил келтирмаган. «Вагнер» асосчиси хорижда яшаётган, дам олаётган ва болаларни чет элда тарбиялаётган расмийларни «ватан хоинлари» деб атаган.
Пригожиннинг Кремль маъмуриятига қарши дадил баёнотлари ҳақида CNN ҳам хабар берган. Нашр Россия президенти Владимир Путин Пригожин ва унинг «Вагнер» ёлланма аскарларидан Россия элитасини тўхтатиб туриш учун фойдаланаётгани таъкидланади. Россиянинг Украинага кенг бостириб кириши пайтида Пригожин жамоат арбобига айланган. У «Вагнер»хусусий ҳарбий кампанияни яратишдаги ролини очиқ тан олади ва Кремль рухсати билан ўн минглаб маҳбусни урушда қатнашишга жалб қилмоқда.
Изоҳ (0)