Putin rus elitasini qo‘rqitish uchun Prigojindan foydalanmoqda — CNN
Rossiya prezidenti Vladimir Putin oligarx Yevgeniy Prigojin va uning “Vagner” yollanma askarlaridan Rossiya elitasini to‘xtatib turish uchun foydalanmoqda. Bu haqda CNN xabar berdi.
Nashrning ta’kidlashicha, Rossiyaning Ukrainaga keng bostirib kirishi paytida Prigojin jamoat arbobiga aylandi. U “Vagner” guruhi deb atalmish xususiy harbiy kampaniyani yaratishdagi rolini ochiq tan oladi va Kreml ruxsati bilan o‘n minglab mahbusni urushda qatnashishga jalb qilmoqda.
Prigojin tez-tez frontda va uning atrofida ko‘rinish beradi. U yerda “vagnerchilar” bilan gaplashadi, nutqidagi qo‘pol iboralardan xijolat tortmaydi. Shu bilan birga, oligarx Rossiya Mudofaa vazirligi rahbariyati bilan haqiqiy media urushini boshlab, vazir Sergey Shoygu va unga bo‘ysunuvchi generallarning ochiq tanqidchilaridan biriga aylandi. Prigojin harbiylarni urushning muvaffaqiyatsiz borishi uchun ochiqchasiga qoralaydi va bunga “Vagner”ning “yutuqlari” bilan qarshi turishga harakat qiladi.
Jurnalistlar Prigojinning Rossiya harbiy qo‘mondonligiga qarshi ommaviy kampaniyasi Putinga to‘g‘ridan to‘g‘ri qarshilik ko‘rsatmasligini aytmoqda.
“Rossiya prezidentiga harbiy infratuzilmani tanqid qiladigan odamga ega bo‘lish foydali bo‘lishi mumkin”, — deyiladi xabarda.
Xuddi shu kontekstda rossiyalik muxolifatchi jurnalist va bloger Maksim Trudolyubovning fikri keltirilgan:
“Prigojin bu — Putin o‘z elitasini qo‘rqitish va o‘zlarini yaxshi tutishi uchun yaratgan dahshatli qo‘rqitgich. Shu tariqa Putin ham qonuniy, ham jinoiy zo‘ravonlik ustidan o‘z nazoratini reklama qiladi”, — deydi u.
Mavzuga doir:
- Putin birinchi marta qamoqxonadan urushga yollangan “Vagner” jangchisini mukofotladi (video)
- Rossiyada “Vagner” guruhi a’zolarining qabristoni topildi (video)
- “Vagner” o‘quv-mashq markazidan olti mahbus qochib ketdi, ular orasida o‘zbekistonliklar ham bor
- “Vagner” rahbari Yevgeniy Prigojin uyushgan jinoyatchilik va korrupsiya bo‘yicha “Yil odami” deb topildi
