O‘zbekiston moliyaviy iste’mol krediti berish tartibi soddalashtiriladi. Bu haqda Oliy Majlis Qonunchilik palatasi xabar bermoqda.
Qayd etilishicha, moliyaviy iste’mol krediti berish tizimi takomillashtirilishi munosabati bilan “Iste’mol krediti to‘g‘risida”gi O‘zbekiston qonunining 15-moddasiga o‘zgartish kiritish haqidagi qonun loyihasi ko‘rib chiqilgan.
Ushbu hujjat dastlab joriy yil 10-yanvar kuni quyi palata majlisida birinchi o‘qishda qabul qilingan edi. Muhokamalar jarayonida loyiha yuzasidan deputatlar tomonidan bir qator takliflar berilgandi.
Loyihaga ko‘ra, banklarga O‘zbekistonda ishlab chiqarilmagan tovarlar uchun ham iste’mol krediti ajratishga ruxsat berilmoqda. Shu paytga qadar iste’mol krediti faqat O‘zbekiston ishlab chiqarilgan mahsulotlar uchun ajratilar edi.
Bu odamlarga nima beradi?
O‘zbekiston banklarida iste’mol krediti mikroqarzga nisbatan pastroq foizda ajratiladi.
O‘zbekistonliklar mikroqarzni banklardan 50 mln so‘mgacha olishi mumkin. Iste’mol krediti esa 400 mln so‘mgacha ajratiladi.
Yangi qonun loyihasi mamlakat aholisiga xorijda ishlab chiqarilgan mahsulotlar uchun kamroq foizda va ko‘proq miqdorda kredit olish imkonini beradi.
Ayrim bank sohasi xodimlari fikriga ko‘ra, qonun loyihasi odamlar orasida bankka bo‘lgan ishonchni yanada oshirishi mumkin.
Bundan tashqari 15-moddada nazarda tutilgan “iste’molchi moliyaviy iste’mol krediti olish to‘g‘risida iste’mol tovarlarini (xizmatlarni) ishlab chiqaruvchi yoki realizatsiya qiluvchini oldindan yozma yoki elektron shaklda xabardor qilishi shart” degan qism chiqarib tashlandi.
Buning natijasida iste’molchi tomonidan ishlab chiqaruvchi yoki realizatsiya qiluvchini oldindan xabardor qilishi shartligi o‘z ahamiyatini yo‘qotadi.
Izoh (0)