Finance TCI kompaniyasi “Kapitalbank”ning asosiy aksiyadoriga aylandi. Bu haqda bank tomonidan Yagona korporativ axborot portalida ma’lumot qoldirilgan.
Finance TCI 2022-yil 28-dekabrda birja savdolarida bank ustav kapitalining 50 foizini tashkil qiluvchi 214,4 mln dona oddiy aksiyasini sotib olgan edi. Bitim 786,89 mlrd so‘mga imzolangan va bir dona aksiyaning narxi 3 670 so‘mdan hisoblangan.
“Bankers.uz”ning aniqlik kiritishicha, “Kapitalbank”ning 50 foiz aksiyasi bir marta bitim tuzish orqali sotilgan. Ushbu miqdordagi aksiyalar Rossiyaning “Telekominvest” shirkatiga tegishli. Bitim natijasida shirkat bank aksiyadorlari safidan chiqqan bo‘lishi mumkin.
Hozirda Finance TCI bankning 61,54 foiz aksiyalarini nazorat qilmoqda.
2022-yil yanvarida o‘sha paytda Alisher Usmonovning USM xoldingi tuzilmalariga tegishli bo‘lgan kompaniya bankning 8,33 foiz ulushiga ega bo‘ldi.
USM’ning sho‘ba korxonasi “Telekominvest” 2021-yilning kuzida bank aksiyadoriga aylandi, keyin esa o‘z ulushini kengaytirdi.
Yanvar oyi oxiriga kelib Usmonovga aloqador kompaniyalar “Kapitalbank”ning 58,33 foizini nazorat qilgan.
Rossiyaning Ukrainadagi urushi ortidan, Alisher Usmonov, bir qator rossiyalik oligarxlar kabi g‘arb sanksiyalari ostida qoldi.
Buning oqibatida, 2022-yilning mart oyida USM “Telekominvest” va Finance TCI kompaniyalarini “Kapitalbank biznesini rivojlantirishdan manfaatdor bo‘lgan xususiy investorlar guruhiga sotilishini e’lon qildi.
O‘zbekistondan ro‘yxatdan o‘tkazilgan Finance TCI kompaniyasining egaligi USM xoldingining top menejerlari qo‘liga o‘tgan edi.
Finance TCI rahbari Timur Afzalov hisoblanadi. Hozirda kompaniyaga Djuzum SPV egalik qilmoqda. Djuzum SPV ayni vaqtda Uzum, Uzum Market, Uzum Technologies hamda One Factor va Fast Delivery Technologies kompaniyalarining ham egasi sanaladi.
Avvalroq Forbes O‘zbekistondagi 10 ta eng ishonchli bankni e’lon qilgan edi.
Izoh (0)