Ўзбекистон молиявий истеъмол кредити бериш тартиби соддалаштирилади. Бу ҳақда Олий Мажлис Қонунчилик палатаси хабар бермоқда.
Қайд этилишича, молиявий истеъмол кредити бериш тизими такомиллаштирилиши муносабати билан «Истеъмол кредити тўғрисида»ги Ўзбекистон қонунининг 15-моддасига ўзгартиш киритиш ҳақидаги қонун лойиҳаси кўриб чиқилган.
Ушбу ҳужжат дастлаб жорий йил 10 январь куни қуйи палата мажлисида биринчи ўқишда қабул қилинган эди. Муҳокамалар жараёнида лойиҳа юзасидан депутатлар томонидан бир қатор таклифлар берилганди.
Лойиҳага кўра, банкларга Ўзбекистонда ишлаб чиқарилмаган товарлар учун ҳам истеъмол кредити ажратишга рухсат берилмоқда. Шу пайтга қадар истеъмол кредити фақат Ўзбекистон ишлаб чиқарилган маҳсулотлар учун ажратилар эди.
Бу одамларга нима беради?
Ўзбекистон банкларида истеъмол кредити микроқарзга нисбатан пастроқ фоизда ажратилади.
Ўзбекистонликлар микроқарзни банклардан 50 млн сўмгача олиши мумкин. Истеъмол кредити эса 400 млн сўмгача ажратилади.
Янги қонун лойиҳаси мамлакат аҳолисига хорижда ишлаб чиқарилган маҳсулотлар учун камроқ фоизда ва кўпроқ миқдорда кредит олиш имконини беради.
Айрим банк соҳаси ходимлари фикрига кўра, қонун лойиҳаси одамлар орасида банкка бўлган ишончни янада ошириши мумкин.
Бундан ташқари 15-моддада назарда тутилган «истеъмолчи молиявий истеъмол кредити олиш тўғрисида истеъмол товарларини (хизматларни) ишлаб чиқарувчи ёки реализация қилувчини олдиндан ёзма ёки электрон шаклда хабардор қилиши шарт» деган қисм чиқариб ташланди.
Бунинг натижасида истеъмолчи томонидан ишлаб чиқарувчи ёки реализация қилувчини олдиндан хабардор қилиши шартлиги ўз аҳамиятини йўқотади.
Изоҳ (0)