Rossiya yoqilg‘isini Yevropaga yetkazib berishda Hindistonning roli ortmoqda — Bloomberg

5-fevraldan boshlab Rossiya neft mahsulotlarini import qilish bo‘yicha Yevropa embargosining kuchga kirishi dizel yoqilg‘isini yetkazib berishning global yo‘nalishlarini sezilarli darajada o‘zgartiradi. Bu haqda Bloomberg ma’lumot bermoqda.

Ma’lumotlarga ko‘ra, bunga Rossiyaning yangi neft xaridorlari yordam beradi. Ular xomashyoni qayta ishlagach, uni Yevropaga qaytarib yuboradi.

Bunday xaridorlarga Ukrainada urush boshlanganidan keyin Rossiya neftining chegirmali eng yirik xaridorlaridan biriga aylangan Hindiston ham kiradi.

Vortexa tahlilchilarining fikriga ko‘ra, 2022-yil dekabr oyida Rossiya bu mamlakatga bir oy oldingiga qaraganda 24 foizga ko‘proq xom neft yetkazib bergan va uni asosan xususiy neftni qayta ishlash zavodlari sotib olgan.

Shu bilan birga, Hindiston va AQSH Yevropa Ittifoqiga dizel yetkazib berish hajmini oshirdi, chunki ular iste’mol qilganidan ko‘proq yonilg‘i ishlab chiqarmoqda.

Hindistondan eksportning ortishi “Rossiya nefti Yevropaga sotilmasdan oldin Hindistonga yo‘naltiriladi va dizel yoqilg‘isiga qayta ishlanadi” degan ma’noni anglatadi.

Bloomberg qayd etishicha, bu YI sanksiyalarini buzmaydi, biroq cheklovchi choralar samarasizligini ko‘rsatadi. Aslini olganda, bu jarayonda neft mahsulotlari “odatdagidan minglab kilometr uzoqroqqa, keyin esa orqaga tashiladi”.

Ma’lumotlarga ko‘ra, bunda yuklarni qayta chiqarish yoki yonilg‘ini Rossiyaga tegishli bo‘lmagan neft mahsulotlari bilan aralashtirish kabi “ko‘proq shubhali bitimlar” xavfi bor.

Ukrainada urush boshlanishidan oldin Rossiya Yevropaga eng yirik yoqilg‘i yetkazib beruvchi bo‘lgan.

Endilikda uning asosiy xaridorlari Afrika, Lotin Amerikasi va Osiyodan kelgan treyderlar bo‘ladi. YI Rossiya eksportining o‘rnini bosish uchun kuniga 600 ming barrelgacha dizel yoqilg‘isi sotib olishni ta’minlashi kerak.

Avvalroq Bloomberg Yaqin Sharq mamlakatlarini YI va Buyuk Britaniyaga yoqilg‘i yetkazib berishning eng aniq yangi manbai deb atagan. Bundan tashqari, Xitoy dizel eksportini oshirmoqda.