Японияда юқори нархлар сабаб банкрот бўлган компаниялар икки баравар кўпайди

2022 йилда нархлар ошиши сабабли Япония компаниялари ўртасида банкротлик ҳолатлари 2021 йилга нисбатан икки баравар кўпайди. Бу ҳақда Teikoku Databank статистик маркази таяниб, «ТАСС» хабар бермоқда.

Ўтган йилнинг 12 ойи давомида нефть, ёқилғи ва хом ашё «сотиб олиш нархининг ошиши» ҳамда бунинг натижасида етказиб берувчилар билан боғлиқ муаммолар туфайли юзага келган 320 та банкротлик ҳолати аниқланган.

Бу 2021 йилга нисбатан 2,3 баробар кўп, ўшанда мазкур кўрсаткич 138 тани ташкил қилган.

Ушбу банкротликларнинг асосий қисми қурилиш соҳасида (70 та), иккинчи ўринда транспорт ва коммуникациялар соҳасида (64), учинчи ўринда эса ишлаб чиқариш саноатида (61) қайд этилган.

«Ҳозирда энергия ва озиқ-овқат нархининг ўсиш суръати секинлаша бошлади, аммо вазият ҳали ҳам қийин. Шу боис, келажакда нархларнинг ошиши давом этиши мумкин, бу эса тегишли сабабларга кўра банкротлик ҳолатлари сонининг кўпайишига олиб келади», — дея таъкидлаган тадқиқот муаллифлари.

2022 йилда жами 6,4 минг япон компанияси банкрот деб эълон қилинди, бу 2021 йилга нисбатан 5 фоизга кўпдир. Тегишли кўрсаткичнинг ўсиши Японияда сўнгги уч йил ичида биринчи марта қайд этилди.

Банкрот компанияларнинг қарз мажбуриятларининг умумий миқдори қарийб 2,3 триллион иенани (тахминан 17,4 миллиард доллар) ташкил этди.

Пандемия, шунингдек, Украина атрофидаги вазият ва Россияга қарши турли санкциялар жорий этилиши муносабати билан ҳозирда Япония компаниялари хом ашё ва энергия ресурслари нархининг ошиши билан боғлиқ бир қатор қийинчиликларга дуч келмоқда.

Бундан ташқари, баъзи фирмалар Россияга қарши санкциялар қўлланилгандан ва таъминот занжирлари узилганидан кейин сотиб олинган маҳсулотларнинг аналогларини излашга мажбур бўлди.

Нарх сиёсатининг беқарорлигининг яна бир омили япон иенасининг қадрсизланиши бўлиб, бу импорт харажатларининг ошишига ва натижада ишлаб чиқариш жараёнидаги юқори харажатларга олиб келади.

Япония 24 йил ичида биринчи марта 22 сентябрда валюта интервенциясини амалга оширган. Яъни Япония ўз валютасини АҚШ долларига нисбатан янада заифлашишига йўл қўймаслик учун иена сотиб олиб, унинг қийматини оширишга ҳаракат қилган.

2022 йилнинг октябрида мамлакат валютаси долларга нисбатан сўнгги 32 йилдаги энг паст даражага етган. Кейинчалик валюта курси барқарорлашган.