2022 йилда дунё бўйлаб ўлдирилган журналистлар сони сезиларли даражада ошди. Бу ҳақда UNESCO ҳисоботига таяниб, Deutsche Welle хабар берди.
UNESCO маълумотларига кўра, 2022 йилда дунё бўйлаб 86 нафар журналист ва медиа ходимлари ўлдирилган, бу ҳар тўрт кунда битта қотиллик дегани. Қайд этилишича, биргина Мексикада 19 нафар, Украинада 10 нафари ва Гаитида 9 нафар журналист вафот этган. Бу журналистларнинг ўз фаолияти давомида жиддий хавф ва заифликларга дуч келаётганидан далолат беради.
UNESCO’нинг олдинги ҳисоботларига кўра, 2019—2021 йилларда ўртача 58 нафар журналист ўлдирилган, 2021 йилда 55 та қотиллик қайд этилган. Шу билан бирга, ўтган уч йил аввалги йилга нисбатан ўлимларнинг камайгани билан ажралиб туради: 2018 йилда 99 журналист фаолияти давомида ўлдирилган.
UNESCO бош директори Одри Азулей ўз баёнотида 2022 йилда ҳалок бўлганлар сони «ташвишли» эканини айтди.
«Мамлакатлар ҳукуматлари бу жиноятларга чек қўйиш ва айбдорларнинг жазоланишини таъминлаш учун саъй-ҳаракатларини икки баравар ошириши керак, чунки лоқайдлик бу зўравонлик муҳитининг асосий омилларидан биридир», — деди у.
Қотилликларнинг тўртдан уч қисми можародан ҳоли мамлакатларга тўғри келади, ўлимларнинг ярмидан кўпи Лотин Америкасида содир бўлган. Журналистларнинг ўлдирилишига айрим сабаблар уюшган жиноятчилик, қуролли тўқнашувлар ёки экстремизмнинг кучайиши ҳақидаги хабарлар учун «қасос» билан боғлиқ. Баъзи журналистлар коррупция, экологик жиноятлар, ҳокимиятни суиистеъмол қилиш ва намойишлар каби нозик мавзуларни ёритгани учун ўлдирилган.
UNESCO ҳалок бўлган журналистларнинг деярли ярми иш вақтидаги ҳужумлар қурбони бўлганини қайд этди. Баъзилар машина ҳайдаб кетаётган пайтида, тўхташ жойларида ёки бошқа жамоат жойларида ҳужумга учраган, бошқалари эса ўз уйида қотиллик қурбони бўлган.
Изоҳ (0)