Rossiya mudofaa vaziri Sergey Shoygu Qurolli kuchlar tarkibini 1,5 million kishigacha oshirish masalasi bo‘yicha yig‘ilish o‘tkazdi, deb xabar bermoqda Mudofaa vazirligi.
Unda vazir Kareliya respublikasida armiya korpusini shakllantirish, quruqlikdagi qo‘shinlar tarkibida uchta motoo‘qchilar diviziyasini va ikkita harbiy-desant qo‘shinlari diviziyasini shakllantirishni hamda Harbiy-dengiz floti, Havo-kosmik kuchlari va Stratetegik maqsadli raketa qo‘shinlari jangovar tarkibini kuchaytirishni topshirdi. Shuningdek, u ikkita — Moskva va Leningrad harbiy okruglarini yaratishni buyurdi.
Majlis chog‘ida Shoygu Rossiyaning yangi subyektlari hududlarida mustaqil qo‘shinlar guruhlarini yaratish, shuningdek, G‘arbiy, Markaziy, Sharqiy harbiy okruglarda va Shimoliy flotdagi yettita motoo‘qchi brigadalarni motoo‘qchi diviziyalar sifatida qayta tashkil etish zarurligini aytdi. Rossiya qurolli kuchlari tarkibi, soni va tuzilmasiga kiritish taklif etilgan o‘zgarishlar 2023—2026-yillarda joriy qilinishi rejalashtirilmoqda.
21-dekabr kuni Shoygu Rossiya qurolli kuchlari sonini 1,5 million kishiga, shu jumladan, 670 ming kontrakt askariga yetkazish kerakligini aytgan edi. Shuningdek, u harbiy xizmat uchun yosh chegarasini bosqichma-bosqich oshirishni taklif qilib, harbiy xizmatga qabul qilishni 18 yoshdan 21 yoshgacha, yosh chegarasini esa 27 yoshdan 30 yoshgacha oshirishni ilgari surdi.
1-yanvar kuni Rossiya prezidenti Vladimir Putinning “Rossiya Federatsiyasi Qurolli kuchlari shtat sonini belgilash to‘g‘risida”gi farmoni kuchga kirdi, unga ko‘ra, Rossiya qurolli kuchlari harbiy xizmatchilari soni 1 150 628 kishi deb belgilangan.
Avvalroq Shoygu “maxsus harbiy operatsiya olib borilayotgan zona”da “Vostok” qo‘shin guruhi shtabini ko‘zdan kechirgani xabar berilgan edi.
Izoh (0)