“Tolibon” o‘g‘rilikda ayblangan to‘rt kishining qo‘lini omma oldida kesib tashladi

“Tolibon” Afg‘onistonning Qandahor viloyatida to‘qqiz kishini omma oldida jazoladi. Bu haqda Hasht-e Subh Daily xabar berdi.

Ommaviy jazolash “tadbiri” Qandahor viloyati stadionida o‘tkazilgan. O‘g‘rilik qilgani uchun to‘rt kishining qo‘li omma oldida kesib tashlangan. Nikohdan oldingi munosabat va jinoyatlarda ayblangan yana besh nafar ayblanuvchi hibsga olingan.

“Tolibon” Farah viloyatida qotillikda ayblangan shaxsga nisbatan qasos hukmini ijro etgan. Ayni paytda Afg‘oniston shimoli-sharqidagi Badaxshon viloyatida toliblar yosh qiz va yigitni nikohdan oldin aloqada bo‘lganlikda ayblab qamchilagan. Ularning har biri omma oldida 38 darra urilgan.

20-dekabrda “Tolibon” harakati Afg‘onistonning ikki viloyatida 30 kishini, jumladan, ayollarni qamchilagandi. Ular o‘g‘rilik, zino va giyohvand moddalar savdosida ayblanib, 25 dan 39 darragacha urilgan. Jazolanganlar orasida 3 nafar ayol ham bo‘lgan, mahalliy amaldorlar va qabila oqsoqollari hukm ijrosini nazorat qilgan.

14-dekabr kuni “Tolibon” 20 kishini zino, o‘g‘rilik va boshqa jinoyatlarda ayblab, jamoat oldida qamchilagandi. Unda har bir erkak 35 dan 39 martagacha kaltaklangan va bu “Tolibon” rasmiylari, diniy ulamolar, oqsoqollar va mahalliy aholi oldida amalga oshirilgan. Jazolanganlarning aksariyati qilgan jinoyatlariga ko‘ra qamoq jazosiga hukm qilingan.

Ma’lumot uchun, “Tolibon” yetakchisi jinoyatchilarni “shariat qonunlari” asosida jazolashni buyurgan.