Shavkat Mirziyoyevning Singapurga davlat tashrifi arafasida Uzbekistan Airports va Changi Airports International o‘rtasida Strategik hamkorlik to‘g‘risida bitim imzolandi, deb xabar bermoqda Uzbekistan Airports matbuot xizmati.
Qayd etilishicha, hujjat faqat ikkita potensial loyihaning texnik-iqtisodiy asoslarini birgalikda ishlab chiqishni nazarda tutadi: mavjud Toshkent xalqaro aeroportini rivojlantirish, jumladan, uning raqobatbardoshligi va yo‘lovchilarga xizmat ko‘rsatish sifatini ko‘tarish, ilg‘or texnologiyalarni joriy etish va yo‘lovchilar oqimini oshirish hamda yangi Toshkent xalqaro aeroportini rejalashtirish va qurish.
Tomonlar 6 oy ichida birgalikda ikki loyihaning barcha aspektlarini tahlil qilib, poytaxtga yangi aeroport kerak yoki kerak emasligi, poytaxtga qayday aeroport kerak, agar u yangi aeroport bo‘lsa, uni qayerda qurish ma’qulroq va bunday loyihaning narxi qancha bo‘lishini hisoblab chiqishi lozim.
Loyihaning umumiy qiymati 1 milliard AQSH dollarigacha yetishi kutilmoqda.
“Biz dunyodagi eng yaxshi aeroportlardan biri, shuningdek, eng yirik xalqaro xablardan birini yaratgan kompaniyaning yangi poytaxt aeroporti loyihasiga qiziqishini olqishlaymiz. Toshkent qulay geografik joylashuvga ega ekanligini hisobga olsak, mamlakatimizda xuddi shunday konsepsiyalarni amalga oshirish mumkin. Bundan tashqari, Changi — bu ilg‘or texnologiyalar, aeroport faoliyatidagi katta tajriba, dunyo tomonidan tan olingan loyiha. Bunday hamkor bilan ishlash biz uchun katta sharaf ”, — deya izoh bergan Uzbekistan Airports boshqaruvi raisi Ra’no Jo‘rayeva.
Changi aeroporti — Osiyodagi aviatsiya markazlaridan biri va Singapurdagi yagona xalqaro aeroport. 1981-yilda ochilganidan buyon aeroport aviatsiya sanoatida etalonga aylandi va 1987-yildan 2007-yilgacha yigirma yil davomida 280 dan ortiq mukofotlarga sazovor bo‘ldi. 2019-yilda Singapurning Changi aeroportida 68,3 million yo'lovchi ro‘yxatdan o‘tgan va bu aeroportni xalqaro yo‘lovchilar soni bo‘yicha dunyodagi 7-o‘ringa olib chiqqan.
Izoh (0)