Шавкат Мирзиёевнинг Сингапурга давлат ташрифи арафасида Uzbekistan Airports ва Changi Airports International ўртасида Стратегик ҳамкорлик тўғрисида битим имзоланди, деб хабар бермоқда Uzbekistan Airports матбуот хизмати.
Қайд этилишича, ҳужжат фақат иккита потенциал лойиҳанинг техник-иқтисодий асосларини биргаликда ишлаб чиқишни назарда тутади: мавжуд Тошкент халқаро аэропортини ривожлантириш, жумладан, унинг рақобатбардошлиги ва йўловчиларга хизмат кўрсатиш сифатини кўтариш, илғор технологияларни жорий этиш ва йўловчилар оқимини ошириш ҳамда янги Тошкент халқаро аэропортини режалаштириш ва қуриш.
Томонлар 6 ой ичида биргаликда икки лойиҳанинг барча аспектларини таҳлил қилиб, пойтахтга янги аэропорт керак ёки керак эмаслиги, пойтахтга қайдай аэропорт керак, агар у янги аэропорт бўлса, уни қаерда қуриш маъқулроқ ва бундай лойиҳанинг нархи қанча бўлишини ҳисоблаб чиқиши лозим.
Лойиҳанинг умумий қиймати 1 миллиард АҚШ долларигача етиши кутилмоқда.
«Биз дунёдаги энг яхши аэропортлардан бири, шунингдек, энг йирик халқаро хаблардан бирини яратган компаниянинг янги пойтахт аэропорти лойиҳасига қизиқишини олқишлаймиз. Тошкент қулай географик жойлашувга эга эканлигини ҳисобга олсак, мамлакатимизда худди шундай концепцияларни амалга ошириш мумкин. Бундан ташқари, Чанги — бу илғор технологиялар, аэропорт фаолиятидаги катта тажриба, дунё томонидан тан олинган лойиҳа. Бундай ҳамкор билан ишлаш биз учун катта шараф », — дея изоҳ берган Uzbekistan Airports бошқаруви раиси Раъно Жўраева.
Чанги аэропорти — Осиёдаги авиация марказларидан бири ва Сингапурдаги ягона халқаро аэропорт. 1981 йилда очилганидан буён аэропорт авиация саноатида эталонга айланди ва 1987 йилдан 2007 йилгача йигирма йил давомида 280 дан ортиқ мукофотларга сазовор бўлди. 2019 йилда Сингапурнинг Чанги аэропортида 68,3 миллион йўловчи рўйхатдан ўтган ва бу аэропортни халқаро йўловчилар сони бўйича дунёдаги 7-ўринга олиб чиққан.
Изоҳ (0)