Rossiya tomonidan boshlangan urushda Ukrainaning mag‘lub bo‘lishi uchinchi jahon urushining boshlanishiga olib kelishi mumkin. Bu haqda Polsha bosh vaziri Mateush Moravetski Berlinga tashrifi chog‘ida gapirdi.
“Liberal dunyoning 30 yili o‘ttiz yillik illyuziya bo‘lib chiqdi. G‘arbiy Yevropa rus ayig‘ini qo‘lga o‘rgatish mumkinligiga juda oson ishondi. Ukrainaning mag‘lubiyati uchinchi jahon urushi debochasi bo‘lishi mumkin, shuning uchun Kiyevni qo‘llab-quvvatlashga to‘sqinlik qilishga va ishlarni noma’lum muddatga qoldirishga asos yo‘q”, — dedi Moravetski.
Polsha bosh vaziri Rossiyaning urushda g‘alaba qozonsa, dunyo jiddiy oqibatlarga duch kelishidan ogohlantirdi. U Germaniya rasmiylarini qat’iy bo‘lishga va Ukrainani “barcha turdagi qurollar” bilan ta’minlashga chaqirdi. Shu bilan birga, Moravetski G‘arbiy Yevropani Rossiya bilan munosabatlarni qayta tiklashga urinmaslikka chaqirdi.
“Rossiya bilan muomala qilish shayton bilan kelishishga o‘xshaydi. Bu rus gaziga qaram davlatlar bo‘ynidagi ilmoqqa aylandi. G‘arb uchun shunchaki baxtsiz biznes manfaatlari masalasi bo‘lgan narsa Ukraina va Polsha kabi mamlakatlar uchun hayot-mamot masalasiga aylandi”, — deya xulosa qildi u.
Ukrainaga nemis qurollarini yetkazib berish
2022-yilda Germaniya Ukrainaga asosiy qurol yetkazib beruvchilardan biriga aylandi. O‘q otish qurollaridan tashqari, yozdan beri Berlin og‘ir tizimlarni — Mars II MLRS, Panzerhaubitzen 2000 o‘ziyurar gaubitsalari, Gepard zenit tanklari va boshqalarni yetkazib berishni boshladi.
Hozirgacha Germaniya Ukrainaga frontda eng kerakli qurol turlaridan biri – jangovar tanklarni yetkazib berishdan bosh tortmoqda.
O‘tgan hafta Polsha o‘zining “Leopard” tanklaridan iborat kompaniyani Ukrainaga topshirishga va’da bergan edi. Biroq Germaniya ishlab chiqaruvchi sifatida ushbu ta’minot uchun ruxsat berishi kerak.
Mavzuga doir:
Izoh (0)