Namangan viloyatining Pop tumanida yuk mashinasi yonib ketgani haqida xabar berilgan edi. FVV matbuot xizmati holat yuzasidan batafsil ma’lumot berdi.
Qayd etilishicha, 15-yanvar kuni soat 16:09 da Namangan viloyati Pop tumani “Qo‘shminor” MFY hududida ketma-ket harakatlanib ketayotgan uchta MAN yuk mashinasi ishtirokida yo‘l-transport hodisasi sodir bo‘lgan.
Oqibatda yuk avtomobillarida yong‘in kelib chiqqan. Birinchi yuk avtomobili yoqilg‘i tashishga mo‘ljallangan bo‘lib, mazut, ikkinchi avtomobilga ko‘mir, uchinchi avtomobilga bo‘yoq mahsulotlari ortilgan bo‘lgan.
Voqea joyiga to‘rtta yong‘in-qutqaruv ekipaji soat 16:30 da yetib borib, yong‘in soat 16:33 da qurshab olingan va soat 17:20 da bartaraf etilgan.
Hodisa oqibatida yuk avtomobillarida bo‘lgan uch nafar fuqaro halok bo‘lgan.
Hozirda IIB tezkor tergov guruhi tomonidan surishtiruv ishlari olib borilmoqda.
Izoh (0)