Toshkentda savdo markazlari va istirohat bog‘lari ish vaqtiga cheklov o‘rnatildi

Toshkentda savdo va xizmat ko‘rsatish shoxobchalari, ko‘ngilochar savdo markazlari qisqartirilgan ish rejimiga o‘tkaziladi.

Poytaxt hokimligi matbuot xizmatining ma’lum qilishicha, aholi xonadonlariga elektr va gaz ta’minotini uzluksiz yetkazish maqsadida oziq-ovqat do‘konlari va umumovqatlanish korxonalaridan tashqari barcha savdo va xizmat ko‘rsatish shoxobchalari, ko‘ngilochar savdo markazlari va istirohat bog‘lari ish faoliyatini ertalab soat 10:00 dan 17:00 ga qadar amalga oshirishi lozim.

Ish vaqtidan so‘ng, barcha elektr asboblari, isitish uskunalari o‘chirilgan holda elektr va gaz iste’moli to‘xtatiladi.

Bundan avval Toshkentda elektr tizimiga yuklamani pasaytirish, hamda markazlashgan issiqlik tizimi (otopleniye)da haroratni ko‘tarish maqsadida, eng kamida uch kun davomida ko‘p qavatli uylarning issiq suv ta’minotida haroratni vaqtincha pasaytirilishi ma’lum qilingandi.