Afg‘oniston TIV binosi yonida 11-yanvar kuni xudkush terrorchi o‘zini portlatib yuborgani haqida xabar berilgandi. O‘zbekiston Tashqi ishlar vazirligi mazkur holat yuzasidan bayonot e’lon qildi.
Ta’kidlanishicha, vazirlik sodir etilgan terrorchilik xurujini keskin qoralaydi.
Ushbu qabih harakat ko‘plab insonlar, asosan, tashqi siyosat idorasi xodimlari orasida qurbonlarga sabab bo‘ldi. Halok bo‘lganlarning oila a’zolari va yaqinlariga chuqur hamdardlik bildirib, jarohatlanganlarning tezroq sog‘ayib ketishini tilaymiz, — deyiladi xabarda.
Ma’lumot uchun, Afg‘oniston TIV binosi oldidagi terakt uchun javobgarlikni ISHID o‘z zimmasiga oldi. Xudkush terrorchining ismi Xaybar Qandagari bo‘lib, Tashqi ishlar vazirligi xodimlari va qo‘riqchilari orasida o‘zini portlatgan. Hujum oqibatida 21 kishi halok bo‘lgan, 40 kishi jarohatlangan. “Tolibon” vakilining aytishicha, xudkush terrorchi vazirlik binosiga kirishga uringan. Jangari xavfsizlik xodimlari tomonidan to‘xtatilgan, shundan so‘ng u portlash sodir etgan.
Hodisa yuz bergan kun Xitoy delegatsiyasi TIVga kelishi kerak bo‘lgan, biroq portlash vaqtida ular u yerda bo‘lgan yoki bo‘lmagani ma’lum emas. Hujumdan maqsad tashqi ishlar vaziri o‘rinbosari Sher Muhammad Abbos Stanizkayni yo‘q qilish bo‘lgani aytilmoqda. Uning xavfsiz va salomat ekani qayd etilgan.
Afg‘onistondagi so‘nggi portlashlar
1-yanvarda Kobuldagi harbiy aeroportda portlash yuz berib, 14 kishi halok bo‘lgandi.
12-dekabr kuni Kobul shahrida xitoyliklar bo‘lgan “Shahr-No” mehmonxonasiga hujum qilingandi. Voqea joyida bir necha portlashlar ham eshitilgan.
Ma’lumot o‘rnida, Afg‘onistonning Samangon viloyatidagi diniy maktabda 29-noyabr kuni portlash sodir bo‘lgandi. Hodisa oqibatida 35 kishi halok bo‘lgan va 23 kishi jarohatlangan.
Izoh (0)