O‘zbekiston xalq artisti Murod Rajabov bu yil 74 yoshni qarshilaydi. O‘zbek kinosining “Temir erkagi” deya e’tirof etiladigan aktyor 1973-yili “Olovli sohil” filmidagi kichik roli bilan san’at olamiga qadam qo‘ygan. U faoliyati davomida “Ajoyib xayolparast”, “Temir xotin”, “Buyuk Amir Temur”, “Kichkina tabib” kabi turli janrlardagi filmlarga suratga tushgan.
Bir necha yildan buyon qandli diabet bilan og‘riyotgan Murod Rajabov 2015-yildan buyon filmlarda suratga tushayotgani yo‘q. Ijtimoiy tarmoqlarda Murod Rajabovning xastalanib qolgani haqidagi xabarlar tarqalgach, “Daryo” muxbirlari ijodkor xonadoniga tashrif buyurdi.
— Salomatligim gohida undoq, gohida bundoq. Bundan keyin shunday bo‘laverar ekan. Kayfiyatim ham doim yaxshi emas. Ayni kunlarda kayfiyatim deyarli yaxshi emas, desa bo‘ladi, — deydi O‘zbekiston xalq artisti Murod Rajabov.
Aktyorning salomatligi so‘nggi yillarda yomonlashdi. Ammo u kinodagi faoliyatini 2015-yil to‘xtatgandi. Buning boisini u quyidagicha izohladi.
— Ha deb kinolarda suratga tushaveradimi?! O‘ylab qarasam, 25 yoshimda mashhurlikka erishgan aktyorman. O‘tgan yillar mobaynida 100 dan ortiq filmda suratga tushdim. Ularning yarmi davlat filmlari bo‘lsa, qolgani xususiy kinostudiyalar tomonidan suratga olingan. Endi boshqalar ham ham chiqsin. Agar televizorda ko‘p ko‘rinsangiz, darrov gap qilishadi. Bir paytlar “Murod Rajabov ekranga chiqaveradimi?” deyishardi. Ko‘rinmay qolsangiz ham darrov odamlarga gap topiladi, — deydi aktyor.
Ustoz san’atkor bugungi yoshlar ijodini kuzatib borishini, ammo ularga havas qilmasligi haqida gapirib o‘tdi.
— Hozir qiladigan ishim yo‘q. Turgan gapki, televizorda berilayotgan narsalarni ko‘rib, yosh ijodkorlarning ishlarini kuzatib boraman. Ammo havas qiladigan yoki biror rolni kutib yashaydigan yoshda emasman, — deydi Murod Rajabov.
Murod Rajabov “Muqimiy” teatriga direktor qilib tayinlangani, “Asl xazina” nomli spektaklni sahnalashtirgani va “yozdi-chizdi”lardan so‘ng san’atdan ko‘ngli qolgani haqida aytib o‘tdi.
— Juda ko‘p narsadan dilim og‘rigan. Qo‘pol qilib aytganda bugun san’at hech kimga kerak emas. Rahbarlarga-ku umuman kerak emas. Bizda san’atni qadrlaydigan odamlar juda kam ekan. Shunday zamonlarga qolib ketibmiz. Bir paytlar bunday emas edi. San’at ijodkorlarning asosiy mashg‘uloti edi. Bor e’tiborini unga qaratardi. Hozir unday emas. Muammoning sababi juda ko‘p. Bunga san’atkorlar ham, xalq ham, hatto jurnalistlar ham sababchi. “Asl xazina” spektakli yomon bo‘lmagan, o‘z tomoshabinini topgandi, ammo u ham kimgadir yoqmadi, — deydi aktyor.
Murod Rajabov nafaqat aktyor, balki kinoprodyuser va rejissor sifatida bir nechta filmlarni suratga olgan. Afsuski, keyingi paytlarda u suratga olgan filmlar ekranlarda berilmaydi. Buning sababini ijodkor quyidagicha izohladi.
— Buning sababini kimdan so‘rayman? Biladigan odamlardan so‘rasam, yelka qisishadi. Indamaydi yoki bilsa-da, sizga aytmaydi. Nafaqat “Anora”, men suratga tushgan boshqa filmlar ham ekranlarda berilmaydi. Buning sababi menga ham qorong‘i. “Zapret” juda noto‘g‘ri narsa. San’atkorni ijoddan ajratib bo‘lmaydi — ijodkorga erkinlik kerak, — deydi Murod Rajabov.
Suhbatni to‘liq holda tomosha qiling.
Izoh (1)
Umrlari uzoq bolsin Murod akani yaxshi ko'ramiz