Jahon sog‘liqni saqlash tashkiloti O‘zbekistonda 20 nafardan ortiq bolaning o‘limiga sabab bo‘lgan Hindistonda ishlab chiqarilgan “Dok-1 Maks” va “Ambronol” preparatlari bo‘yicha ogohlantirdi.
Ikkala mahsulot ishlab chiqaruvchisi Marion Biotech Pvt. Ltd (Uttar-Pradesh, Hindiston) kompaniyasi bo‘lib, hozirda litsenziyasi to‘xtatilgan. Hozirga qadar mazkur kompaniya JSSTga ushbu mahsulotlarning xavfsizligi va sifati uchun kafolat bermagan.
O‘zbekiston Sog‘liqni saqlash vazirligi tomonidan har ikki mahsulot namunalarining laboratoriya tahlili shuni ko‘rsatdiki, ularning tarkibida yuqori miqdorda dietilen glikol va/yoki etilen glikol mavjud. JSST 22-dekabr kuni O‘zbekistondan xabarnoma olganini ma’lum qilgan.
Preparatlar norasmiy bozorlar orqali boshqa mamlakatlar yoki hududlarga tarqatilgan bo‘lishi mumkin.
“Dietilen glikol va etilen glikol iste’moli odamlar uchun toksik bo‘lib, o‘limga olib kelishi mumkin. Sifatsiz mahsulotlar xavfsiz emas va ulardan foydalanish, ayniqsa bolalarda jiddiy oqibatlarga yoki o‘limga olib keladi. Toksik ta’sirlar orasida qorin og‘rig‘i, ko‘ngil aynishi, diareya, peshob chiqara olmaslik, bosh og‘rig‘i, ruhiy holatning o‘zgarishi va o‘limga olib keladigan o‘tkir buyrak zararlanishi bo‘lishi mumkin”, — deyiladi JSST ogohlantirishida.
Tashkilot bemorlarga zarar yetkazmaslik uchun past sifatli mahsulotlarni aniqlab, sotuvdan olib tashlash muhimligini ta’kidlagan.
JSST ushbu mahsulotlar ta’siriga tushishi mumkin bo‘lgan mamlakat va mintaqalarning ta’minot zanjirlarida nazorat va ehtiyotkorlikni kuchaytirishni talab qilgan.
“Tarkibida propilen glikol, polietilen glikol, sorbitol yoki glitserin kabi yordamchi moddalarni o‘z ichiga olgan siroplarni ishlab chiqaruvchilarga tibbiy mahsulotlardan foydalanishdan oldin etilen glikol va dietilen glikol kabi zararli moddalar mavjudligini tekshirish tavsiya etiladi”, — deyiladi murojaatda.
Sog‘liqni saqlash tashkiloti barcha tibbiy mahsulotlar vakolatli yetkazib beruvchilar tomonidan tasdiqlanishi kerakligini qayd etgan.
Mavzuga doir:
- Hindistonda “Dok-1 Maks” dorisini ishlab chiqarish to‘xtatildi
- Hindistonda “Dok-1 Maks” dorisini ishlab chiqargan kompaniyaga qarshi ish ochildi
- Hindistonda “Dok-1 Maks” dorisini ishlab chiqargan zavod ustidan tekshiruvning dastlabki natijalari e’lon qilindi
- JSST O‘zbekistonda “Dok-1 Maks” dorisidan bolalar o‘lgani yuzasidan munosabat bildirdi
Izoh (0)