Жаҳон соғлиқни сақлаш ташкилоти Ўзбекистонда 20 нафардан ортиқ боланинг ўлимига сабаб бўлган Ҳиндистонда ишлаб чиқарилган «Док-1 Макс» ва «Амбронол» препаратлари бўйича огоҳлантирди.
Иккала маҳсулот ишлаб чиқарувчиси Marion Biotech Pvt. Ltd (Уттар-Прадеш, Ҳиндистон) компанияси бўлиб, ҳозирда лицензияси тўхтатилган. Ҳозирга қадар мазкур компания ЖССТга ушбу маҳсулотларнинг хавфсизлиги ва сифати учун кафолат бермаган.
Ўзбекистон Соғлиқни сақлаш вазирлиги томонидан ҳар икки маҳсулот намуналарининг лаборатория таҳлили шуни кўрсатдики, уларнинг таркибида юқори миқдорда диэтилен гликол ва/ёки этилен гликол мавжуд. ЖССТ 22 декабрь куни Ўзбекистондан хабарнома олганини маълум қилган.
Препаратлар норасмий бозорлар орқали бошқа мамлакатлар ёки ҳудудларга тарқатилган бўлиши мумкин.
«Диэтилен гликол ва этилен гликол истеъмоли одамлар учун токсик бўлиб, ўлимга олиб келиши мумкин. Сифатсиз маҳсулотлар хавфсиз эмас ва улардан фойдаланиш, айниқса болаларда жиддий оқибатларга ёки ўлимга олиб келади. Токсик таъсирлар орасида қорин оғриғи, кўнгил айниши, диарея, пешоб чиқара олмаслик, бош оғриғи, руҳий ҳолатнинг ўзгариши ва ўлимга олиб келадиган ўткир буйрак зарарланиши бўлиши мумкин», — дейилади ЖССТ огоҳлантиришида.
Ташкилот беморларга зарар етказмаслик учун паст сифатли маҳсулотларни аниқлаб, сотувдан олиб ташлаш муҳимлигини таъкидлаган.
ЖССТ ушбу маҳсулотлар таъсирига тушиши мумкин бўлган мамлакат ва минтақаларнинг таъминот занжирларида назорат ва эҳтиёткорликни кучайтиришни талаб қилган.
«Таркибида пропилен гликол, полиэтилен гликол, сорбитол ёки глицерин каби ёрдамчи моддаларни ўз ичига олган сиропларни ишлаб чиқарувчиларга тиббий маҳсулотлардан фойдаланишдан олдин этилен гликол ва диэтилен гликол каби зарарли моддалар мавжудлигини текшириш тавсия этилади», — дейилади мурожаатда.
Соғлиқни сақлаш ташкилоти барча тиббий маҳсулотлар ваколатли етказиб берувчилар томонидан тасдиқланиши кераклигини қайд этган.
Мавзуга доир:
- Ҳиндистонда «Док-1 Макс» дорисини ишлаб чиқариш тўхтатилди
- Ҳиндистонда «Док-1 Макс» дорисини ишлаб чиқарган компанияга қарши иш очилди
- Ҳиндистонда «Док-1 Макс» дорисини ишлаб чиқарган завод устидан текширувнинг дастлабки натижалари эълон қилинди
- ЖССТ Ўзбекистонда «Док-1 Макс» дорисидан болалар ўлгани юзасидан муносабат билдирди
Изоҳ (0)