Hindiston hukumati “Dok-1 Maks” dorisini ishlab chiqargan Marion Biotech kompaniyasiga qarshi surishtiruv boshladi, deb xabar bermoqda Reuters. Kompaniya ushbu siropni ichlab chiqarishni to‘xtatgan.
Surishtiruv Hindistonning Uttar-Pradesh shtatidagi preparatlarni litsenziyalash va nazorat qilish boshqarmasi tomonidan olib borilmoqda.
Ular O‘zbekiston hukumatidan ham ushbu dori oqibatida vafot etgan bolalar haqida hisobot so‘ragan.
Hindistonda ishlab chiqarilgan “Dok-1 Maks” siropini iste’mol qilish ortidan hozircha Samarqandda 18 nafar, Toshkent va Qashqadaryoda bir nafardan, jami 20 nafar bola vafot etgani ma’lum.
Davlat xavfsizlik xizmati tomonidan “Dok-1 Maks” preparati bilan bog‘liq holat yuzasidan jinoyat ishi qo‘zg‘atilgan.
