Чеченистон Меладзени республика халқ артисти унвонидан маҳрум қилишдан бош тортди

Валерий Меладзе «Украинага шон-шарафлар бўлсин» деган иборага жавоб бераётгани акс этган видео туфайли, уни Чеченистон халқ артисти унвонидан маҳрум қилишмоқчи эмас. Бу ҳақда республика Маданият вазирлиги маълум қилди.

«Чеченистон Республикаси Россия яхлитлигини ёқлаб, халқаро терроризмга қарши чиқади, барқарорликни, мамлакат раҳбарияти сиёсатини ёқлайди, ҳозирча эса буларга у (Меладзе) томонидан тил теккизилгани йўқ. Чеченистон Республикаси Украина ҳудудида конституциявий тартиб ўрнатилишида фаол иштирок этмоқда. Барчамиз урушга қарши чиқамиз, ҳамма тинчлик ва аҳилликда яшашини истаймиз. Уни ‘Халқ артисти’ унвонидан маҳрум қилиш масаласи кўтарилганича йўқ», — дейишди идорада.

Ижтимоий тармоқларда тарқалган видеода Дубайдаги корпоратив кечада Меладзенинг мухлиси унга «Украинага шон-шараф!» дея мурожаат қилган. Бунга жавобан Меладзе микрофонни оғзидан олиб, «Қаҳрамонларга шон-шараф» дея жавоб қайтарган ва кўзини қисиб қўйган. Хонанда корпоратив кечаси «сиёсатдан ташқарида» эканини айтиб ўтган.

Россия расмийлари эса Меладзенинг Украинанинг қўллаб-қувватлаб айтган шиорини танқид қилиб, уни Россия фуқаролигидан маҳрум қилишга ва хорижий агент деб эълон қилишга чақирган.

Меладзенинг ўзи эса 3 январь куни Instagram саҳифасида танқидларга муносабат билдирган.

«Одамлар, мени эшитишингизни ва сўзларимни тушунишингизни хоҳлайман. Мана 10 ойдирки, мен ҳам бошқа одамлар каби қайғу ҳисси билан яшаяпман. Мен жуда яхши кўрган халқлар тўқнашувда бўлиб, одамлар ҳалок бўлмоқда. Ҳеч кимдан нафратланишни хоҳламайман ва кимнидир рози қилишга ҳам ҳаракат қилмайман. Мен фақат қарама-қаршилик тўхтаб, яқин халқлар ўртасида тотувлик ўрнатилишини орзу қиламан. Бунинг учун эса бор кучимни беришга тайёрман», — дейди Меладзе.

Меладзе Батумида туғилган ва бир неча йиллар давомида Украинада яшаб, таълим олган. Чеченистон халқ артисти унвонини 2008 йилда қўлга киритган. Хонанда — Россияда хизмат кўрсатган артист.

Ўтган йил февралида Меладзе Украинадаги жанговар ҳаракатларга қарши чиққан илк санъаткорлардан бирига айланди. «Сиздан ҳарбий ҳаракатларни тўхтатиб, музокаралар олиб боришни сўрайман, ялинаман… Одамлар ҳалок бўлмаслиги керак, буни тўхтатиш керак», — деган эди у Россия махсус операцияси бошланган куни.