Rossiya aholisiga “vatanparvarlik”, “qadriyatlar” haqida gapiradigan rossiyalik amaldor, deputat va xavfsizlik xodimlarining farzandlari NATO va Yevropa Ittifoqi mamlakatlarida dam olishni afzal ko‘radi. The Insider nashri ular haqida ma’lumot berdi.
Sanksiyaga kiritilgan Rossiya amaldorlarning farzandlari NATO va Yevropa Ittifoqi mamlakatlariga tashrif buyurishda davom etmoqda, Ukraina bilan urush olib borayotgan siyosatchilarning farzandlari orasida Dubay, Bali, Maldiv va Seyshel orollari mashhur dam olish maskanlari hisoblanadi.
Sergey Narishkinning qizi
Rossiya Tashqi razvedka xizmati rahbari Sergey Narishkinning qizi Veronika Yevropa kurortlarida dam olishni yaxshi ko‘radi. Uning ota-onasi Shimoliy Atlantika alyansi tomonidan Rossiyaga tahdidlar haqida gapirar ekan, Veronika NATO a’zosi bo‘lgan Turkiyaga tashrif buyurishni afzal ko‘radi. Shuningdek, dugonasi, “Lokomotiv” klubi va Rossiya milliy terma jamoasining sobiq futbolchisi Aleksey Kosolapovning qizi, bilan Italiya va Gretsiya plyajlarida vaqt o‘tkazadi.
2022-yil oxirida ular Baliga yo‘l olgan va u yerda AYANA Resort Bali mehmonxonasida qolgan. Mehmonxonada bir kunlik dam olish 500 dollardan oshadi.
The Insider’ga ko‘ra, Veronika dunyo bo‘ylab xavfsiz harakatlana oladi, chunki Narishkinlar oilasi AQSH va Yevropa Ittifoqining sanksiyalar ro‘yxatiga kiritilmagan.
Sergey Shoyguning qizi
“Ukrainada NATO mamlakatlariga qarshi jang qilayotgani”ni aytayotgan Rossiya mudofaa vazirining qizi Kseniya Shoygu turmush o‘rtog‘i, bloger Aleksey Stolyarov bilan birgalikda Yangi yilni Birlashgan Arab Amirliklarida o‘tkazdi. Juftlik Dubaydagi Caesars Palace Dubai mehmonxonasida qoldi. Jurnalistlarning so‘zlariga ko‘ra, u yerdagi ta’til er-xotinga kamida 500 ming rublga (7 283 dollar) tushgan.
The Insider 2022-yilgacha Kseniya Shoygu Capital Perform investitsiya kompaniyasiga egalik qilgani va u orqali davlat pullarini o‘zlashtirganini ta’kidlamoqda. Kompaniya davlat muassasalari haydovchilarini pullik tibbiy ko‘rikdan o‘tkazgan, shuningdek, Rossiyada stadionlar, ko‘priklar va yo‘llar qurish uchun subpudratlar olgan.
Senator Jabarovning o‘g‘li
Federatsiya Kengashining Xalqaro ishlar bo‘yicha qo‘mitasi raisining birinchi o‘rinbosari Vladimir Jabarov o‘zining Amerikaga qarshi chiqishlari bilan tanilgan. Biroq, uning o‘g‘li Aleksandr AQSHga sayohat qilishni yaxshi ko‘rishi ma’lum bo‘ldi.
Kichik Jabarovning Instagram sahifasida San-Fransisko va Los-Anjelesdan olingan suratlar bor. Rossiyalik siyosatchining o‘g‘li Ukrainadagi urush paytida Yevropa mamlakatlari — Norvegiya va Shvetsiyada dam olgan. Yaqinda u Turkiya va Dubayga ham tashrif buyurgan. Jabarovning o‘g‘liga nisbatan sanksiyalar qo‘llanilmagan.
Spiker Valentina Matviyenko va vitse-spiker Aleksandr Jukovning kelinlari
Rossiya Federatsiya Kengashi spikeri Valentina Matviyenkoning kelini Yuliya Italiyadagi oilaviy villada dam olishni afzal ko‘radi, shuningdek, Kambodja va Turkiyada vaqt o‘tkazadi. Yangi yil bayramlari uchun u Maldiv orollariga uchib ketgan va u yerda Waldorf Astoria Maldives Ithaafushi mehmonxonasida qolgan. U yerda bir kecha taxminan 3 ming yevroga baholanadi.
Davlat Dumasi vitse-spikeri Aleksandr Jukovning kelini kuzda Gretsiyaning Mikonos orolida ko‘rinish bergan. U Indoneziyaning Bali orolida Yangi yilni nishonlagan.
Rossiya Bosh shtab boshlig‘ining kelini
Rossiya Bosh shtabi rahbari Valeriy Gerasimovning kelini Alena Ukrainaning Qrimida dam olmoqda, garchi bu yarimorolni bosib olish paytida noqonuniy hisoblanadi. Uning ijtimoiy tarmoqlaridagi akkauntida Alushta shahridagi Porto Mare mehmonxonasidan olingan fotosurati mavjud.
Izoh (0)