Бердимуҳамедов яна Конституцияни ўзгартириб, бир палатали парламентни қайтармоқчи

Туркманистон собиқ президенти Гурбангули Бердимуҳамедов мамлакат конституциясига ўзгартиришлар киритиб, Халқ Маслаҳатига катта ваколатлар бериш нияти ҳақида маълум қилди. Бу ҳақда «Хроники Туркменистана» хабар бермоқда.

Туркманистон Халқ Маслаҳати раиси Гурбангули Бердимуҳамедов яна бир марта Конституцияни ўзгартириш, бир палатали парламент — Мажлисни қайтариш, Халқ Маслаҳатини эса яна олий вакиллик органига айлантиришни (2020 йилги ўзгаришларгача шундай бўлган) таклиф қилди.

Бу таклифни катта Бердимуҳамедов 11 январь куни Миллий Кенгаш (парламент)нинг иккала палатаси аъзолари қўшма мажлисида ўртага ташлади ва буни «қонунчилик органини замоннинг реал сўровлари асосида такомиллаштириш» зарурияти билан изоҳлади.

Халқ Маслаҳати таркибига Гурбангули Бердимуҳамедов, унинг ўғли Сердар, Мажлис раҳбари, Олий суд раиси, Бош прокурор ва бошқалар киради.

Халқ Маслаҳати Туркманистон Конституциясига ўзгартиришларни маъқуллаши, ички ва ташқи сиёсат йўналишларини маъқуллаб бериши, мамлакатни ривожлантириш дастурларини тасдиқлаши, хавфсизлик ва тинчлик масалаларини кўриб чиқиши мумкин бўлади.

Таъкидланишича, Халқ Маслаҳати биринчи марта 1992 йилда ташкил қилинган ва Туркманистонда олий вакиллик органи ҳисобланган.

2008 йилда ҳокимият тепасига Гурбангули Бердимуҳамедов келганидан кейин орган Оқсоқоллар кенгашига айлантирилган ва барча қонунчилик ваколатларидан маҳрум қилинган.

Орадан ўн йил ўтиб, 2018 йилда орган яна Халқ Маслаҳати деб қайта номланган. Кенгаш мажлисларида унинг вакиллари мамлакатда электр токи, газ ва сувдан фойдаланиш учун бепул лимитнинг бекор қилинишини маъқуллади, кейинроқ эса Конституцияга ўзгартиришлар киритиш ва парламентни икки палатали қилишни ёқлаб овоз берди.

Шундан кейин парламентнинг қуйи палатаси Мажлис (унгача Мажлис — бир палатали парламентнинг умумий номи бўлган), юқори платаси эса Халқ Маслаҳати (ҳозир унинг раиси Гурбангули Бердимуҳамедов ҳисобланади) деб атала бошлади.

Халқ Маслаҳати энди парламент палатасини англатгани учун, халқ вакиллик органи 2022 йилда Давлат маслаҳати деб қайта номланди.