O‘zbekistonning qator viloyatlarida 11-yanvardan darslar boshlanadi

O‘zbekistonning qator viloyatlaridagi maktablarda 3-chorak darslari 11-yanvardan boshlanadi. “Daryo” o‘qish boshlanadigan hududlar ro‘yxatini taqdim etadi.

Dastlab 10-yanvar kuni soat 20:15 da Maktabgacha va maktab ta’limi vazirligi tomonidan rasmiy ma’lumot e’lon qilindi. Unda ta’kidlanishicha, qishki ta’til davrini uzaytirish vakolati hududdagi ob-havo sharoitini inobatga olgan holda mahalliy hokimliklarga berilgan.

Shundan so‘ng 21:32 da bog‘chalardagi ta’til nazorati ham mahalliy hokimliklar zimmasiga yuklatildi. Bunda hokim maktabgacha ta’lim tashkilotining isitish tizimi hamda boshqa sharoitlarni inobatga olishi kerakligi belgilangan.

Xorazm viloyati xalq ta’limi boshqarmasi tomonidan 12:10 da e’lon qilingan xabarda 11—18-yanvar kunlari hududda havo harorati keskin tushib ketmasligini aytilgan. Shuni inobatga olib, 2023-yilning 11-yanvar sanasidan barcha umumiy o‘rta ta’lim maktablarida o‘qish jarayoni boshlanishini ma’lum qilingan.

Soat 12:34 da e’lon qilingan xabarga ko‘ra, Andijon viloyatidagi ta’lim muassasalarida ham 11-yanvardan rasman o‘quv jarayonlari boshlanadi. Shu bilan birga, ta’lim muassasalarining kelgusi faoliyati ob-havo sharoitidan kelib chiqqan holda tashkil etiladi.

Farg‘ona viloyatidagi maktablarda o‘qish 16-yanvardan boshlanadi. 11-yanvardan 12 ta oliy o‘quv yurtlari, 76 ta texnikumlar, kollejlar, kasb-hunar maktablarida o‘qishlar boshlanishi belgilangan.

Viloyat hokimligi tomonidan soat 15:02 da e’lon qilingan xabarga ko‘ra, hududdagi 975 ta umumta’lim maktablarida, Prezident, ijod va ixtisoslashtirilgan maktablarda esa o‘qish 16-yanvar, dushanba kunidan boshlanishiga qaror qilindi.

Navoiy viloyati hokimligi hududdagi ta’lim muassasalarda ta’lim jarayoni qachondan boshlanishi bo‘yicha rasmiy ma’lumot bermadi. Ammo Navoiy davlat pedagogika institutida o‘quv jarayonlari 11-yanvardan boshlanishi haqida xabar berildi.

Anomal sovuq kunlari talabalardan ehtiyotkorlik bilan, shoshilmasdan, yo‘l harakati qoidalariga amal qilib harakatlanish tavsiya etilgan. O‘quv xonalari hamda talabalar turar joylari issiqlik bilan ta’minlangan va barchasi shay holatga keltirilgan.

Buxoro viloyatidagi barcha umumta’lim maktablarida 3-chorak darslari 11-yanvardan boshlanadi. Bu haqda viloyat xalq ta‘limi boshqarmasi soat 17:04da e’lon qildi.

Samarqand viloyati hokimligi axborot xizmati tomonidan soat 21:23 da e’lon qilingan xabarga ko‘ra, 11-yanvar kunidan 950 ta umumta’lim, 71 ta o‘rta-maxsus ta’lim va 13 ta oliy ta’lim muassasalarida an’anaviy shaklda darslar boshlanadi.

Shuningdek, havo harorati keskin sovigan vaqtda transportda borish qiyinligi, masofa uzoqligi va zarur issiqlik bilan ta’minlash imkoniyati cheklanganligi sababli 97 ta umumta’lim va 2 ta o‘rta-maxsus ta’lim muassasalarida 13-yanvardan hamda 208 ta umumta’lim muassasalarida 18-yanvardan o‘quv jarayoni boshlanadi.

Surxondaryo hokimligi soat 21:41 da rasmiy ma’lumot chiqardi. Unda aytilishicha, viloyatidagi barcha umumta’lim maktablarida ya’ni 11-yanvar kunidan an’anaviy shaklda darslar boshlanadi.

Termiz shahar va tumanlar hokimliklari, hududiy shtablar tomonidan Xalq ta’limi boshqarmasi hamda ta’lim muassasalari bilan hamkorlikda maktablarning isitish tizimini barqaror ishlashini ta’minlash bo‘yicha zarur choralar ko‘riladi.

Oradan biroz vaqt o‘tgach Qoraqalpog‘istondagi maktablarda o‘quv jarayoni 12-yanvardan boshlanishi ma’lum qilindi. 12—18-yanvar kunlari barcha umumta’lim maktablarida turli uchrashuvlar, o‘quvchilar uchun qo‘shimcha to‘garaklar, sport musobaqalari va boshqa yig‘ilishlar o‘tkazish rejalashtirilgan.

Toshkent shahri hokimligi soat 22:47 da tezkor munosabat bildirdi. Unda poytaxt maktablaridagi darslar 11-yanvardan boshlab ishlashga tayyorligiga qarab, bosqichma-bosqich boshlanishi aytilgan.

“Bu boradagi qaror maktablar rahbariyati tomonidan ota-onalar kengashi bilan kelishgan holda qabul qilinishi tavsiya etiladi. Hokimlik tomonidan kommunal xizmat tizimlari mas’ullari bilan birgalikda bu sohada yuzaga kelgan muammolarni tezkorlik bilan hal etish choralari ko‘riladi”, — deyiladi xabarda.

Jizzax viloyati xalq ta’limi boshqarmasi 11-yanvar kunidan jami 140 ta maktablarda dars mashg‘ulotlarini tashkil etish imkoniyati mavjudligi aniqlanib, faoliyatini yo‘lga qo‘yish rejalashtirilganini ma’lum qildi.

Qashqadaryo viloyatida 11-yanvardan boshlab, hududdagi ob-havo sharoiti va ta’lim muassasalari hamda OTM yotoqxonalaridagi shart-sharoitlardan kelib chiqib, bosqichma-bosqich ta’lim jarayonlari boshlanadi.

Shuningdek, tog‘li va uzoq qishloqlar maktablarida, sovuq kunlarda transportda borish qiyinligi va masofa uzoqligi mavjud bo‘lgan maktablarda ta’lim jarayonlari 16-yanvardan boshlanadi. Xalq ta’limi boshqarmasi tasarrufidagi imkoniyati cheklangan maxsus maktab-internatlarida o‘qish 18-yanvardan boshlanadi.

Hozirga qadar Toshkent va Sirdaryo viloyati hokimliklari qishki ta’til qachon tugashi haqida rasmiy ma’lumot bermadi.