Hukumatning tegishli qarori bilan O‘zbekistonda chet el fuqarolariga yashash uchun ruxsatnoma berish muddati qisqartiriladi.
Norma’ning xabar qilishicha, Vazirlar Mahkamasining 2023-yil 7-yanvardagi “Xorijiy davlatlar fuqarolariga O‘zbekiston Respublikasida yashash guvohnomasini olish huquqini berish bilan bog‘liq qonunchilik takomillashtirilishi munosabati bilan Vazirlar Mahkamasining “O‘zbekiston Respublikasida chet el fuqarolari va fuqaroligi bo‘lmagan shaxslarni ro‘yxatga olish tartibini soddalashtirish chora-tadbirlari to‘g‘risida” qaroriga o‘zgartirish va qo‘shimchalar kiritildi.
Hujjatda qayd etilishicha, chet el fuqarolari va fuqaroligi bo‘lmagan shaxslar tomonidan O‘zbekistonda doimiy yashab qolish uchun ruxsatnoma olish, ularning identifikatsiya ID-kartasini rasmiylashtirish va doimiy ro‘yxatga olinishi bo‘yicha taqdim etilgan hujjatlarni ko‘rib chiqish uzoq muddat talab etishi va bu borada ortiqcha bosqichlar mavjudligi, shuningdek, mamlakat iqtisodiyotiga ko‘chmas mulk sotib olish orqali yirik investitsiya kiritgan chet el fuqarolari va fuqaroligi bo‘lmagan shaxslarga yashash guvohnomasini olish huquqini taqdim etish tartibi qonunchilik hujjatlarida aniq belgilab berilmagani muammo bo‘lib qolayotgan edi.
Endilikda chet el fuqarolari va fuqaroligi bo‘lmagan shaxslar uchun yashash uchun guvohnomalarni olish tartibini soddalashtirish va arizalarni onlayn tizim orqali ko‘rib chiqishni nazarda tutuvchi o‘zgartirish va qo‘shimchalar kiritilmoqda.
Shuningdek:
Qoraqalpog‘iston Respublikasida va viloyatlarda doimiy yashashga ruxsatnoma berish haqida arizani ko‘rib chiqish 98 kundan 68 kunga, ko‘rib chiqish bosqichlari esa 10 tadan 8 taga qisqarmoqda;
Toshkent shahri va Toshkent viloyatiga kelgan chet el fuqarolari va fuqaroligi bo‘lmagan shaxslarga doimiy yashash uchun ruxsatnoma berish haqidagi arizani ko‘rib chiqish muddati 128 kundan 68 kunga, ko‘rib chiqish bosqichlari esa 11 tadan 8 taga qisqarmoqda.
Ushbu hujjat 2023-yilning 9-yanvaridan kuchga kirgan.
Izoh (0)