Ҳукуматнинг тегишли қарори билан Ўзбекистонда чет эл фуқароларига яшаш учун рухсатнома бериш муддати қисқартирилади.
Norma’нинг хабар қилишича, Вазирлар Маҳкамасининг 2023 йил 7 январдаги «Хорижий давлатлар фуқароларига Ўзбекистон Республикасида яшаш гувоҳномасини олиш ҳуқуқини бериш билан боғлиқ қонунчилик такомиллаштирилиши муносабати билан Вазирлар Маҳкамасининг «Ўзбекистон Республикасида чет эл фуқаролари ва фуқаролиги бўлмаган шахсларни рўйхатга олиш тартибини соддалаштириш чора-тадбирлари тўғрисида» қарорига ўзгартириш ва қўшимчалар киритилди.
Ҳужжатда қайд этилишича, чет эл фуқаролари ва фуқаролиги бўлмаган шахслар томонидан Ўзбекистонда доимий яшаб қолиш учун рухсатнома олиш, уларнинг идентификация ID-картасини расмийлаштириш ва доимий рўйхатга олиниши бўйича тақдим этилган ҳужжатларни кўриб чиқиш узоқ муддат талаб этиши ва бу борада ортиқча босқичлар мавжудлиги, шунингдек, мамлакат иқтисодиётига кўчмас мулк сотиб олиш орқали йирик инвестиция киритган чет эл фуқаролари ва фуқаролиги бўлмаган шахсларга яшаш гувоҳномасини олиш ҳуқуқини тақдим этиш тартиби қонунчилик ҳужжатларида аниқ белгилаб берилмагани муаммо бўлиб қолаётган эди.
Эндиликда чет эл фуқаролари ва фуқаролиги бўлмаган шахслар учун яшаш учун гувоҳномаларни олиш тартибини соддалаштириш ва аризаларни онлайн тизим орқали кўриб чиқишни назарда тутувчи ўзгартириш ва қўшимчалар киритилмоқда.
Шунингдек:
Қорақалпоғистон Республикасида ва вилоятларда доимий яшашга рухсатнома бериш ҳақида аризани кўриб чиқиш 98 кундан 68 кунга, кўриб чиқиш босқичлари эса 10 тадан 8 тага қисқармоқда;
Тошкент шаҳри ва Тошкент вилоятига келган чет эл фуқаролари ва фуқаролиги бўлмаган шахсларга доимий яшаш учун рухсатнома бериш ҳақидаги аризани кўриб чиқиш муддати 128 кундан 68 кунга, кўриб чиқиш босқичлари эса 11 тадан 8 тага қисқармоқда.
Ушбу ҳужжат 2023 йилнинг 9 январидан кучга кирган.
Изоҳ (0)