Twitter 6-yanvar, juma kuni butun dunyo bo‘ylab kontentni moderatsiya qilish, shuningdek, ijtimoiy tarmoqda nafrat so‘zlari va ta’qiblarga qarshi kurash uchun mas’ul bo‘lgan ba’zi xodimlarni qisqartirgan. Bu haqda Bloomberg xabar berdi.
Manbalarga ko‘ra, kompaniyaning Dublin va Singapurdagi ofislarida kamida o‘n kishi ishdan ayrilgan.
Agentlik ma’lumotlariga ko‘ra, ishini yo‘qotganlar orasida Twitter’ning Osiyo-Tinch okeani mintaqasi bo‘yicha yaxlitligi rahbari Nur Azhar Bin Ayob va Twitter’ning daromad siyosati bo‘yicha katta direktori Analuisa Dominges bor.
Twitter’ning moderatsiya bilan shug‘ullanuvchi ishonch va xavfsizlik bo‘limi boshlig‘i Ella Irvin Bloomberg’ga o‘z jamoasining bir necha a’zolari qisqartirilayotganini tasdiqladi.
Uning ta’kidlashicha, kompaniya turli jamoalarni bir nechta emas, balki bitta rahbar qo‘l ostida birlashtirish zarur deb topdi va Twitter endi ahamiyatsiz deb hisoblagan pozitsiyalarni olib tashladi. Shu bilan birga, u murojaatlar va shikoyatlar bo‘limidagi shtat kengaytirilganini ta’kidladi.
Twitter milliarder Ilon Mask tomonidan sotib olingach, jami 5 mingga yaqin odam kompaniyani tark etgan yoki ishdan bo‘shatilgan. Bu kompaniyaning 7,5 ming nafar xodimining uchdan ikki qismini tashkil etadi.
Ilon Mask Twitter’ni sotib olish bo‘yicha kelishuvni 27-oktabr kuni yakunlab, kompaniya uchun 44 milliard dollar to‘lagan.
Shundan so‘ng tadbirkor ijtimoiy tarmoq xodimlarining yarmiga yaqinini ishdan bo‘shatdi, qolganlarni esa yuqori intensivlik bilan ishlash kerakligi haqida ogohlantirdi.
OAV xabarlariga ko‘ra, ushbu voqealar fonida platforma faoliyatini saqlab qolish uchun muhim bo‘lgan ko‘plab xodimlar Twitter’ni tark etgan.
Izoh (0)