Navoiy viloyati, Karmana tumani, Navoiy erkin iqtisodiy industrial hududidagi “O‘zeraecable” ga tegishli 50 foiz davlat ulushi kimoshdi savdosiga qo‘yildi. Ma’lumotlar “E-auksion” portalida e’lon qilingan.
Lot auksionga Davlat aktivlarini boshqarish agentligining Navoiy viloyat hududiy boshqarmasi tomonidan joylashtirilgan.
Binolar va inshootlarning egallagan umumiy maydoni — 5324,6 kvadrat metr.
Qo‘shma korxonaning ustav kapitali 6,91 mlrd so‘mni tashkil etadi, asosiy fondlarning balans qiymati esa 67,9 mlrd so‘mga teng.
Kombinatning kreditorlik qarzi 32,9 milliard so‘mni tashkil etgan bo‘lsa, debitorlik qarzi 13,9 milliard so‘m. 2021-yilda qo‘shma korxonaning foydasi 4,33 milliard so‘mni tashkil etgan.
Kompaniya 2009-yilda Janubiy Koreyaning Eraye Cs kompaniyasi ishtirokida tashkil etilgan. Zavod “Navoiy” EIZ hududida joylashgan bo‘lib, avtomobillar uchun elektr simlari va boshqa elektr butlovchi qismlarni ishlab chiqarish bilan shug‘ullanadi.
Auksionga qo‘yilgan korxonaning boshlang‘ich bahosi — 48,2 mlrd so‘m. Arizalar 2023-yil 6-fevral 09:00 ga qadar qabul qilinadi. Savdolar xuddi shu kuni 10:00 da boshlanadi.
Izoh (0)