Twitter 6 январь, жума куни бутун дунё бўйлаб контентни модерация қилиш, шунингдек, ижтимоий тармоқда нафрат сўзлари ва таъқибларга қарши кураш учун масъул бўлган баъзи ходимларни қисқартирган. Бу ҳақда Bloomberg хабар берди.
Манбаларга кўра, компаниянинг Дублин ва Сингапурдаги офисларида камида ўн киши ишдан айрилган.
Агентлик маълумотларига кўра, ишини йўқотганлар орасида Twitter’нинг Осиё-Тинч океани минтақаси бўйича яхлитлиги раҳбари Нур Азҳар Бин Аёб ва Twitter’нинг даромад сиёсати бўйича катта директори Аналуиса Домингес бор.
Twitter’нинг модерация билан шуғулланувчи ишонч ва хавфсизлик бўлими бошлиғи Элла Ирвин Bloomberg’га ўз жамоасининг бир неча аъзолари қисқартирилаётганини тасдиқлади.
Унинг таъкидлашича, компания турли жамоаларни бир нечта эмас, балки битта раҳбар қўл остида бирлаштириш зарур деб топди ва Twitter энди аҳамиятсиз деб ҳисоблаган позицияларни олиб ташлади. Шу билан бирга, у мурожаатлар ва шикоятлар бўлимидаги штат кенгайтирилганини таъкидлади.
Twitter миллиардер Илон Маск томонидан сотиб олингач, жами 5 мингга яқин одам компанияни тарк этган ёки ишдан бўшатилган. Бу компаниянинг 7,5 минг нафар ходимининг учдан икки қисмини ташкил этади.
Илон Маск Twitter’ни сотиб олиш бўйича келишувни 27 октябрь куни якунлаб, компания учун 44 миллиард доллар тўлаган.
Шундан сўнг тадбиркор ижтимоий тармоқ ходимларининг ярмига яқинини ишдан бўшатди, қолганларни эса юқори интенсивлик билан ишлаш кераклиги ҳақида огоҳлантирди.
ОАВ хабарларига кўра, ушбу воқеалар фонида платформа фаолиятини сақлаб қолиш учун муҳим бўлган кўплаб ходимлар Twitter’ни тарк этган.
Изоҳ (0)