O‘zbekistonda oilalarni kam ta’minlangan deb topishda daromadidan ijara shartnomasi yoki ipoteka krediti to‘lovlari chiqarib tashlanishi kutilmoqda. Bu haqda Vazirlar Mahkamasining 8-yanvar kuni jamoatchilik muhokamasi uchun e’lon qilgan qarori loyihasida ko‘zda tutilgan.
Unda qayd etilishicha, oilaning kam ta’minlanganligini, uning real daromadi va moddiy imkoniyatlari asosida belgilash va oilani ijtimoiy jihatdan qo‘llab-quvvatlash bo‘yicha ishlarni samarali tashkil etishda muammolar yuzaga kelmoqda.
Jumladan, qonunchilikda turar-joyga muhtoj oilani kam ta’minlangan deb topishda uning yashash joyi bilan bog‘liq xarajatlarini inobatga olish nazarda tutilmagan.
Shu bilan birga, oilaning jami daromad miqdorini hisoblash bo‘yicha amaldagi tartib aholining kam daromadga ega hamda turar-joyga muhtoj qatlamini moddiy jihatdan qo‘llab-quvvatlash va ularning eng minimal ehtiyojlarini qondirish imkonini bermaydi.
Shu munosabat bilan, oilani kam ta’minlangan deb topishda oilaning jami daromadidan ijara shartnomasi yoki ipoteka to‘lovlarini chiqarib tashlash belgilanmoqda.
Ushbu hujjat loyihasi muhokamasi 23-yanvarga qadar davom etadi.
Izoh (0)