Ўзбекистонда оилаларни кам таъминланган деб топишда даромадидан ижара шартномаси ёки ипотека кредити тўловлари чиқариб ташланиши кутилмоқда. Бу ҳақда Вазирлар Маҳкамасининг 8 январь куни жамоатчилик муҳокамаси учун эълон қилган қарори лойиҳасида кўзда тутилган.
Унда қайд этилишича, оиланинг кам таъминланганлигини, унинг реал даромади ва моддий имкониятлари асосида белгилаш ва оилани ижтимоий жиҳатдан қўллаб-қувватлаш бўйича ишларни самарали ташкил этишда муаммолар юзага келмоқда.
Жумладан, қонунчиликда турар-жойга муҳтож оилани кам таъминланган деб топишда унинг яшаш жойи билан боғлиқ харажатларини инобатга олиш назарда тутилмаган.
Шу билан бирга, оиланинг жами даромад миқдорини ҳисоблаш бўйича амалдаги тартиб аҳолининг кам даромадга эга ҳамда турар-жойга муҳтож қатламини моддий жиҳатдан қўллаб-қувватлаш ва уларнинг энг минимал эҳтиёжларини қондириш имконини бермайди.
Шу муносабат билан, оилани кам таъминланган деб топишда оиланинг жами даромадидан ижара шартномаси ёки ипотека тўловларини чиқариб ташлаш белгиланмоқда.
Ушбу ҳужжат лойиҳаси муҳокамаси 23 январга қадар давом этади.
Изоҳ (0)