Xorazm viloyati Xonqa tumanining qayta qurilgan mudofaa ishlari bo‘limi foydalanishga topshirildi. Bu haqda Shimoli-g‘arbiy harbiy okrug matbuot xizmati “Daryo”ga ma’lum qildi.
Qayd etilishicha, ushbu binoga 1886-yilda asos solingan bo‘lib, hovli joy sifatida foydalanilgan. 1917-yildan ishlab chiqarish uchun sex, dorixona va keyinchalik dorixona mudiri yashashi uchun joy, tikuvchilik sexiga joy sifatida xizmat qilgan. 1949-yil Xonqa tumani xalq deputatlari kengashi ijroya qo‘mitasining qaroriga asosan hozirda Do‘stlik ko‘chasidagi 21-uy tuman harbiy komissariatiga kelgusi foydalanish uchun topshirilgan.
O‘zbekiston Respublikasi Davlat arxitektura va qurilish qo‘mitasi Xorazm viloyati “Davarxitektqurilishnazorat” inspeksiyasining 2014-yildagi xulosasiga ko‘ra, ushbu mudofaa ishlari binosi talabga javob bermasligi aniqlangan.
Xorazm viloyati Harbiy-ma’muriy sektori ko‘magi bilan ushbu obyekt qayta qurilib, 21 xonadan iborat ikki qavatli ma’muriy bino, arxiv xonasi, chaqiriluvchilar hamda harbiy xizmatga majburlarning elektron hisobini yuritish bazasi, navbatchilik xonasi, chaqiruv bo‘linmasida chaqiriluvchilarni tibbiy ko‘riklardan o‘tkazish joylari, oshxona, kartoteka, 50 kishiga mo‘ljallangan zal, 3 ta sanitar tizim hamda fuqarolarni qabul qilish xonasi qurilgan.
Ta’kidlanishicha, ikkinchi jahon urushiga aynan mana shu binodan tumanning 9 113 nafar fuqarosi safarbar etilgan. Ulardan 153 nafari janggohlarda jon bergan bo‘lsa, 1 121 nafari bedarak yo‘qolgan.
Izoh (0)