O‘zbekistonda uzaytirilgan ta’til kunlarida bog‘cha tarbiyalanuvchilari uchun haq to‘lanmaydi

O‘zbekistonga kirib kelayotgan anomal sovuq sababli ta’til kunlari 18-yanvarga qadar uzaytirilgandi. Ma’lum bo‘lishicha, ta’til kunlarida maktabgacha ta’lim tashkilotlari tarbiyalanuvchilari uchun haq to‘lanmaydi.

Maktabgacha va maktab ta’limi vazirligi xabariga ko‘ra, bog‘chalarda navbatdan tashqari ta’til e’lon qilingandan so‘ng ko‘plab ota-onalardan mazkur ta’til kunlarida ham bog‘cha puli to‘lanishiga doir ko‘plab savollar kelib tushgan.

Mazkur so‘rovlarga javoban “Maktabgacha ta’lim tashkilotlari va maktab-internatlardagi bolalar ta’minotiga haq to‘lash tartibi to‘g‘risida”gi nizom talablari asosida mazkur ta’til kunlari uchun bog‘cha to‘lovi to‘lanmasligi ma’lum qilingan.

Ta’til e’lon qilingunga qadar bog‘cha to‘lovi amalga oshirilgan bo‘lsa, keyingi to‘lovlarni amalga oshirish jarayonida ta’til kunlari uchun to‘langan badal summasi hisobga olinadi.

Hukumatining tegishli yig‘ilish bayoniga asosan, ta’til kunlari davomida maktabgacha ta’lim tashkilotlarida faoliyat yuritadigan xodimlarga amaldagi tartib saqlangan holda ish haqi to‘lanadi.

Mavzuga doir:

• O‘zbekistonda anomal sovuq kunlarda barcha xodimlarning onlayn ishlashiga ruxsat berish taklif qilindi
• O‘zbekistonda anomal sovuq havoda energiya ta’minotida uzilishlar bo‘lishi mumkin