Хоразм вилояти Хонқа туманининг қайта қурилган мудофаа ишлари бўлими фойдаланишга топширилди. Бу ҳақда Шимоли-ғарбий ҳарбий округ матбуот хизмати «Дарё»га маълум қилди.
Қайд этилишича, ушбу бинога 1886 йилда асос солинган бўлиб, ҳовли жой сифатида фойдаланилган. 1917 йилдан ишлаб чиқариш учун цех, дорихона ва кейинчалик дорихона мудири яшаши учун жой, тикувчилик цехига жой сифатида хизмат қилган. 1949 йил Хонқа тумани халқ депутатлари кенгаши ижроя қўмитасининг қарорига асосан ҳозирда Дўстлик кўчасидаги 21-уй туман ҳарбий комиссариатига келгуси фойдаланиш учун топширилган.
Ўзбекистон Республикаси Давлат архитектура ва қурилиш қўмитаси Хоразм вилояти «Давархитектқурилишназорат» инспекциясининг 2014 йилдаги хулосасига кўра, ушбу мудофаа ишлари биноси талабга жавоб бермаслиги аниқланган.
Хоразм вилояти Ҳарбий-маъмурий сектори кўмаги билан ушбу объект қайта қурилиб, 21 хонадан иборат икки қаватли маъмурий бино, архив хонаси, чақирилувчилар ҳамда ҳарбий хизматга мажбурларнинг электрон ҳисобини юритиш базаси, навбатчилик хонаси, чақирув бўлинмасида чақирилувчиларни тиббий кўриклардан ўтказиш жойлари, ошхона, картотека, 50 кишига мўлжалланган зал, 3 та санитар тизим ҳамда фуқароларни қабул қилиш хонаси қурилган.
Таъкидланишича, иккинчи жаҳон урушига айнан мана шу бинодан туманнинг 9 113 нафар фуқароси сафарбар этилган. Улардан 153 нафари жанггоҳларда жон берган бўлса, 1 121 нафари бедарак йўқолган.
Изоҳ (0)