6-yanvar kuni Qirg‘izistonning Bishkek shahrida O‘zbekiston energetika vaziri Jo‘rabek Mirzamahmudov, Qirg‘iziston energetika vaziri Taalaybek Ibrayev va Qozog‘iston energetika vaziri Bolat Akchulakov tomonidan Qambarota-1 GES qurilishi loyihasi bo‘yicha “yo‘l xaritasi” imzolandi. Bu haqda Energetika vazirligi xabar qildi.
Qayd etilishicha, tomonlar loyihani amalga oshirishning asosiy shartlari va zarur chora-tadbirlarni belgilab olgan.
“Mazkur GES nafaqat Qirg‘iz Respublikasini, balki Markaziy Osiyo mamlakatlarining elektr va suv ta’minotida muhim o‘rin tutadi” — deyiladi xabarda.
Ta’kidlanishicha, loyiha doirasida 5,4 milliard kub metrga teng suv ombori va 1860 MVt quvvatli gidroelektr stansiyasi ishga tushiriladi. Natijada yiliga o‘rtacha 5,6 milliard kVt/soat elektr energiyasi ishlab chiqarish imkoniyati yaratiladi.
Izoh (0)