АҚШ Хитой ҳукуматига COVID-19 тарқалишига қарши курашиш учун зарур бўлган замонавий мРНК вакциналарини етказиб беришни таклиф қилди, бироқ рад жавобини олди. Бу ҳақда Bloomberg ўз манбаларига таяниб хабар бермоқда. Агентлик суҳбатдошларининг таъкидлашича, масаланинг алоҳида «сиёсий нозиклиги»ни инобатга олган ҳолда, вакциналарни воситачилар орқали етказиб беришни йўлга қўйиш таклиф қилинган.
Bloomberg маълумотларига кўра, вакциналарни етказиб бериш бўйича таклифлар АҚШнинг юқори мартабали дипломатлари, жумладан, АҚШ Давлат котиби ёрдамчиси Дэниэл Критенбринк ва АҚШ Миллий хавфсизлик кенгашида Хитой муносабатларини назорат қилувчи Лора Розенбергернинг декабрь ойида Хитойга ташрифи чоғида билдирилган.
Хитойда инфекцияга чалинаётганлар сонининг кўпайиши ва вируснинг янги штаммлари пайдо бўлишидан хавотирга тушган Америка расмийлари сўнгги ҳафталарда ўз саъй-ҳаракатларини кучайтирмоқда, аммо ҳар сафар рад жавобини олмоқда. Хитой расмийлари вазият назорат остида эканини ва ёрдамга муҳтож эмаслигини таъкидламоқда, деди агентлик суҳбатдошлари.
Вашингтондаги Хитой элчихонаси вакилининг айтишича, Хитойда ишлаб чиқилган вакциналар юқори самарадорликка эга бўлиб, уларнинг ишлаб чиқарилиши нафақат мамлакатнинг ички эҳтиёжларини қондириш, балки экспорт қилиш имкониятини ҳам яратади.
Хитой расмийларининг АҚШдан вакцина олишга рози бўлмаётгани ҳақида гап кетар экан, Bloomberg Пекин инқирозлар пайтида ҳар доим ташқи ёрдамдан бош тортиши, ҳозирги шароитда эса бунга розилик Хитойнинг мустақил равишда самарали мРНК вакциналарини ишлаб чиқишга қодир эмаслигини кўрсатишини таъкидлади.
«Ҳатто ҳалокатли COVID-19 эпидемияси ўртасида ҳам Пекин вакцина миллатчилигини намойиш этишда давом этмоқда — бу, шубҳасиз, беҳуда ўлимга олиб келадиган қарор», — деди Стратегик ва халқаро тадқиқотлар марказининг Хитой бўлими раҳбари Жуд Бланшетт.
Аввалроқ Евроиттифоқ ҳукумати Хитойга COVID-19 нинг янги тўлқинига қарши курашда ёрдам сифатида вирусга қарши бепул вакциналарни етказиб беришни таклиф қилган эди. Соғлиқни сақлаш масалалари бўйича еврокомиссар Стелла Кириакидес коронавируснинг дунё бўйлаб қайтадан авж олиши эҳтимолига «европача жавоб»ни ишлаб чиқмоқчилиги айтилганди.
Изоҳ (0)