Россия президенти Владимир Путин 4 январь куни Атлантика ва Ҳинд океанига «Циркон» гипертовушли қанотли ракеталари билан қуролланган фрегатни жўнатди. Бу ҳақда Reuters хабар берди.
Путиннинг таърифига кўра, дунёда мазкур қанотли ракетага тенг келадигани йўқ. Россия президенти мудофаа вазири Сергей Шойгу ва «Адмирал Горшков» фрегати қўмондони Игорь Крохмал билан видеоселектор йиғилишида фрегат «Циркон» гипертовушли қуроли билан жиҳозланганини айтди.
«Бу сафар кема ўхшаши бўлмаган энг янги гипертовушли ракета тизими ‘Циркон’ билан жиҳозланган. Кема экипажига Россия равнақи йўлида хизмат қилишда муваффақият тилайман», — деди Путин.
Шойгунинг айтишича, Горшков Атлантика ва Ҳинд океанлари ҳамда Ўрта Ер денгизи томон сузиб кетади.
« ‘Циркон’ билан қуролланган ушбу кема денгизда ҳам, қуруқликда ҳам душманга аниқ ва кучли зарбалар беришга қодир», — дейди Россия мудофаа вазири.
Шойгунинг айтишича, «Циркон» гипертовушли ракеталар ҳар қандай ракетага қарши мудофаа тизимини енгиб ўта олади. Ракеталар товуш тезлигидан тўққиз баравар тез учади ва 1000 километрдан ортиқ масофани босиб ўтади.
Ҳозирда Россия, Хитой ва АҚШ гипертовушли қуроллар пойгасида. Чунки уларнинг ракеталари товуш тезлигидан беш баравар юқори ва манёвр қобилияти туфайли ҳар қандай рақиб устидан устунликка эришолади.
2022 йил 19 февралда Россия ядровий машғулотлар ўтакзганди, жараённи Путин беларуслик ҳамкасби Александр Лукашенко билан биргаликда кузатганди. Ўшанда машғулотлар доирасида «Кинжал» гипертовушли ракеталари, «Калибр» қанотли ракеталари ва «Циркон» гипертовушли ракетаси денгиз ва қуруқликдаги нишонларга қарата учирилганди.
Изоҳ (0)