Janubiy Koreyada birinchi marta miyani yeb qo‘yadigan amyoba bilan zararlanish holati aniqlangandi. Koreya Kasalliklarni nazorat qilish va oldini olish agentligi kasallikdan ilk o‘lim kuzatilganini ma’lum qildi.
Bemor 21-dekabr kuni vafot etgan, marhum amyoba qo‘zg‘atgan meningit simptomlari bilan og‘rigan. Bundan tashqari unda isitma, bosh og‘rig‘i, ko‘ngil aynishi, bo‘yin qotishi va gapirish qobiliyatini yo‘qotish aniqlangan. Kasallik davrida marhum to‘rt oylik sayohat bilan Tailandda bo‘lgan.
Olingan tahlillarda erkakda o‘limga olib keladigan birlamchi amyoba meningoensefalitini keltirib chiqarishi mumkin bo‘lgan o‘ta xavfli bir hujayrali Naegleria fowleri mavjudligini tasdiqlangan. Infeksiya odatda chuchuk suvlar, jumladan, ko‘llar, daryolar va issiq buloqlarda uchraydi.
Bu odamlarga yuqadigan Naegleria’ning yagona turi bo‘lib, kasallikdan o‘lim 97 foizdan oshadi. Amyoba burun orqali tanaga kiradi va miyaga boradi, miya to‘qimalarining nobud bo‘lishi, miya shishi va o‘limga olib keladi.
Marhumga virus qanday yuqqani haqida ma’lumot berilmagan, biroq infeksiya ko‘pincha ko‘llarda yoki daryolarda suzish, ifloslangan suv bilan burunni yuvganda organizmga kiradi.
“Naegleria fowleri amyobasi yuqishining oldini olish uchun fowleri amyobalari qayd etilgan hududlarga sayohat qilishda ehtiyot bo‘ling. Bunday hududlarda suzish va dam olishdan saqlaning, toza suvdan foydalaning”, — deb maslahat berdi Koreya Kasalliklarni nazorat qilish va oldini olish direktori Yon Mi.
Ma’lumotlarga ko‘ra, so‘nggi 60 yil mobaynida amyoba bilan zaharlanishga bog‘liq 400 ga yaqin holat qayd etilgan, shularning 150 tasi — AQSHda aniqlangan. 97 foiz holatda bemorlar halok bo‘lgan. Shu bilan birga, mutaxassislar aytishicha, bu onda-sonda uchraydigan hodisadir, chunki kasallik odamdan odamga yuqmaydi.
Izoh (0)