“Tolibon” harakati Durand chizig‘i bo‘ylab yo‘l yotqizdi

“Tolibon” harakati Durand chizig‘i bo‘ylab yo‘l yotqizishni yakunladi. Bu haqda Sputnik xabar berdi.

Noyabr oyida aynan shu yo‘lning yotqizilishi sababli Pokiston va “Tolibon” chegarachilari o‘rtasida to‘qnashuv bo‘lgan. “Tolibon” OAV faollarining xabar berishicha, yo‘l yotqizish yakunlangach ishchilar va texnika xavfsizligini ta’minlagan jangchilar 203-“Mansuriy” armiya korpusining muntazam joylashish punktlariga qaytgan.

11-dekabrda “Tolibon” chegara kuchlari Durand liniyasi yaqinida yangi post qurishni rejalashtirganidan keyin Pokiston chegarachilari bilan to‘qnashuv boshlangan. Hodisa oqibatida “Tolibon”ning bir a’zosi halok bo’lgan, 10 nafari esa yaralangandi. Pokiston tomoni esa jangda bir askar jarohat olganini xabar qilgan.

Oradan to‘rt kun o‘tib, 15-dekabrda “Tolibon” Durand chizig‘ida post o‘rnatmoqchi bo‘lganida Pokiston harbiylari bilan otishma bo‘lgan. Oqibatda bir nafar tinch fuqaro halok bo‘lgan, 15 kishi esa yaralangan. Pokiston chegaraga hujumchi vertolyotlar yuborgan va Kobuldagi elchixona xodimlarini evakuatsiya qilgan. Tomonlar hodisada bir birini ayblagan.

“Tolibon” matbuot kotibi Zabihulloh Mujohid 15-dekabr kuni chegaradagi mojaro Pokiston harbiylari tomonidan boshlanganini ma’lum qilgan. Pokiston senatori esa “Tolibon” harakati rahmat o‘rniga “qurol bilan javob berishganini” aytgan. Siyosatchi Afg‘oniston bilan chegaradagi mojarolar soni Hindiston bilan sharqiy chegaradagiga qaraganda oxirgi paytlarda ancha ko‘paygani, mamlakat “Tolibon”ga nisbatan siyosatini qayta ko‘rib chiqishi kerakligini ta’kidlagan.

Mavzuga doir: “Tolibon” chegaradagi vaziyat bo‘yicha Pokistonni ogohlantirdi