Rossiya yadroviy mashg‘ulotlar o‘tkazadi, bu haqda u AQSHni xabardor qildi

Rossiya AQSHni “Yashin” nomi ostida strategik yadro kuchlari mashg‘ulotlarini o‘tkazish rejalari haqida xabardor qilgan. Bu haqda Pentagon matbuot kotibi Patrik Rayder brifing chog‘ida ma’lum qildi. O‘quv mashqlari 26-oktabr, chorshanba kuni boshlanadi.

“AQSH xabardor qilindi, avvalroq ta’kidlaganimizdek, bu Rossiya tomonidan har yili o‘tkaziladigan oddiy o‘quv mashqlari”, — dedi Rayder va Vashington Rossiya manyovrlarini “kuzatishda davom etishi”ni qo‘shib qo‘ydi.

Pentagon matbuot kotibi qayd etishicha, AQSH Rossiya yadro qurolidan yoki “iflos bomba” (kam quvvatli yadroviy o‘q-dori)dan foydalanishni rejalashtirayotganidan darak beruvchi belgilarni ko‘rmayapti. “Rossiya yadroviy, kimyoviy yoki biologik qurolni qo‘llashga qaror qilgani bo‘yicha hech qanday dalillar yo‘q”, — deya qo‘shib qo‘ydi u.

Avvalroq CBS telekanali ikki nafar amerikalik mansabdorga tayanib, ushbu mashg‘ulotlar yadro quroli tashishga qodir raketalar parvozini o‘z ichiga olishi haqida xabar bergandi.

Strategik tiyib turish kuchlarining “Yashin” mashg‘ulotlari bundan avval 19-fevralda o‘tkazilgandi. O‘shanda o‘quv mashqlarining borishini Rossiya prezidenti Vladimir Putin belaruslik hamkasbi Aleksandr Lukashenko bilan birgalikda kuzatgandi.

O‘shanda mashg‘ulotlar doirasida “Kinjal” gipertovushli raketalari, “Kalibr” qanotli raketalari va “Sirkon” gipertovushli raketasi dengiz va quruqlikdagi nishonlarga qarata uchirilgandi. Astraxan viloyatida “Iskander” qanotli raketasi parvozi amalga oshirilgan. Kamchatkada “Sineva” va “Yars” ballistik raketalari otilgan.

Ayni paytda NATOning yadroviy tiyib turish bo‘yicha Steadfast Noon (“Mustahkam choshgoh”) rejali o‘quv mashg‘ulotlari bo‘lib o‘tmoqda, u 17-oktabr kuni boshlanib, 30-oktabrga qadar davom etadi, unda 14 ta mamlakat va 60 tagacha harbiy samolyotlar qatnashmoqda. Mashqlar “Yevropa shimoli-g‘arbi osmonida” — Belgiya va Britaniya havo hududida, shuningdek, Shimoliy dengiz osmonida o‘tkazilmoqda.