Буюк Британия Мудофаа вазирлиги Украинадаги урушнинг қандай кечаётгани бўйича ҳисобот эълон қилди. Вазирликнинг Twitter саҳифасида бу бўйича маълумот берилди.
Ҳисоботда Украинанинг Макеевкага берган зарбалари оқибатида Россия армиясидаги йўқотишлар сони ва бунинг сабаби келтирилади.
«Макеевкадаги бино бутунлай вайрон бўлган ва Россия Мудофаа вазирлиги тасдиқлаганидек, 89 нафар россиялик ҳарбий ҳалок бўлган. Зарар кўламини ҳисобга оладиган бўлса, ўқ-дорилар турар жой бинолари яқинида сақланган. Улар ракета зарбаси пайтида портлаб, иккиламчи портлашларга олиб келган бўлиши мумкин.
Бино урушнинг энг шиддатли нуқтасидан бири бўлган фронт чизиғининг Авдеевка секторидан атиги 12,5 километр узоқликда жойлашган. Россия армияси Украинадаги урушгача хавфли ўқ-дориларни сақлаш тажрибасига эга эди. Аммо нопрофессионаллик Россия армиясида қурбонлар сонининг ошишига сабаб бўлмоқда», — дейилади ҳисоботда.
Эслатиб ўтамиз, Янги йил арафасида Россия армиясининг сафарбар қилинган аскарлари жойлашган Макеевкага ракета зарбалари берилган. Украина томони ҳодиса оқибатида 400 га яқин ҳарбий ҳалок бўлгани, 300 нафари яраланганини хабар қилган.
Россия Мудофаа вазирлиги Макеевкадаги ҳарбийлар жойлаштирилган жойга HIMARS тизими ёрдамида зарба берилганини айтиб, ҳужумда 63 нафар аскар ўлганини хабар қилган. Кейинчалик уларнинг сони 89 кишига ошган.
Мавзуга доир: Украинанинг Макеевкага ҳужуми Путиннинг обрўсига путур етказади — ISW
Изоҳ (0)