Janubiy Koreya prezidenti Yun Sok Yol Chosun Ilbo gazetasiga bergan intervyusida Seul va Vashington Amerika yadroviy qurollari ishtirokida qo‘shma mashg‘ulotlar o‘tkazish imkoniyatini muhokama qilayotganini aytdi.
“Yadro qurollari AQSHga tegishli bo‘lsa-da, razvedka ma’lumotlarini almashish, rejalashtirish va mashg‘ulotlar birgalikda amalga oshirilishi kerak”,— dedi u va AQSHning bu tashabbusga ijobiy munosabatda ekanini ta’kidladi. Mashg‘ulotlar Janubiy Koreyaga Shimoliy Koreyadan keladigan yadroviy tahdidga tayyorlanishda yordam berishi kutilmoqda.
Yun Sok Yolning aytishicha, Pxenyan yadro qurolini yaratguniga qadar, “yadroviy soyabon” Xitoy va SSSRning ehtimoliy harakatlaridan himoyalanish uchun mo‘ljallangandi. “AQSH xavfsizlik uchun qo‘lidan kelganini qilishga va’da bermoqda, shuning uchun Janubiy Koreya xavotirlanmasa ham bo‘ladi”, — dedi prezident. Biroq uning fikricha, hozir bu yetarli emas, “birgina bu bilan odamlarni xavfsizlikka ishontirish qiyin”.
31-dekabr kuni KXDR Mehnat partiyasi yalpi majlisida Kim Chen In mamlakat yadroviy arsenalini kuchaytirish zaruriyati oshganini, chunki Janubiy Koreya “shak-shubhasiz dushman”ga aylanganini ma’lum qildi. Uning bayonotiga javoban Janubiy Koreya yadroviy zarba amalga oshirilgan taqdirda, Kim Chen In rejimiga nuqta qo‘yilishi haqida ogohlantirdi.
Izoh (0)