Ijtimoiy tarmoqlarda O‘zbekiston jurnalistika va ommaviy kommunikatsiyalar universiteti (O‘zJOKU) rektori Sherzod Qudratxo‘janing Xalqaro press-klub ko‘rsatuvida maktab dasturidagi fizika va kimyo fanlari soatlarini qisqartirish haqidagi taklifi keng muhokamalarga sabab bo‘ldi. Sherzod Qudratxo‘ja holatga munosabat bildirib, uning fikrlari noto‘g‘ri talqin qilinayotganini aytdi.
Uning aytishicha, o‘rta ta’lim maktablari o‘quv dasturidan kimyo va fizika fanlarini chiqarib tashlashni taklif qilgani haqidagi xabarlar asossiz.
“Videolavhada 2 soatlik ko‘rsatuvning 30 soniyasi ko‘rsatilgan, xolos. Men ushbu fanlar qiyin qilib yuborilganini aytib, bolalarimizga yengilroq, kreativroq dars o‘taylik, deb taklif kiritdim.
Fizika, kimyo kabi fanlar, albatta, kerak. Lekin bu darslarni o‘qitishda eski qoliplardan voz kechib, zamonaviy metodlardan foydalanishimiz kerak.
Masalan, bir eslanglar, 10—11-sinflarda o‘rgangan qaysi murakkab formula esinglarda qolgan? Darslar qanchalik qiyin bo‘lgan, qizil diplom olishda qanchalik xalaqit qilgan, o‘qishga kirishdan chalg‘itgan? Shu ma’noda aytdim, xolos”, — deya izohlaydi O‘zJOKU rektori.
Sherzod Qudratxo‘janing fikricha, bu fanlarning akademik darajada o‘tilishi oqibatida ta’limda juda ko‘p muammolar kelib chiqqan.
“Vaziyat juda og‘ir. Darsliklar qayta ko‘rib chiqilayotgan paytda farzandlarimiz o‘rganadigan darslar oddiy, hayotiy bo‘lishi kerakligi muhim deb hisoblayman.
Ertaga fizik olim bo‘lmoqchi bo‘lganlar esa keyinchalik fanni chuqurlashtirilgan, fakultativ darslarda, maxsus sinflarda o‘rganishi mumkin”, — deya qo‘shimcha qildi u.
Holatga maktabgacha va maktab ta'limi vaziri Hilola Umarova ham munosabat bildirdi. Uning aytishicha, ushbu fanlarning maktab o‘quvchilariga o‘qitilishi bekor qilinishi haqidagi fikrlar hech bir asosga ega emas va bunday xavotirga o‘rin yo‘q.
Izoh (0)